Nunarsuarmi nungusaataanngitsumik nukissiornermik piumanersuaq sermip aanneranik naammassineqarsinnaava?

Erngup nukinga Kalaallit Nunaanni nungusaataanngitsumik nukissiuuteqarnermi periarfissaalluarpoq, atorniaraannili akisoorsuarnik nukissiorfiliortoqartariaqarluni. Aatsitassarsiorniartut kalaallinit akuerineqassappat ikummatissaq nunap iluaneersoq akikitsoq tunngavigalugu imaluunniit piffissaq sivisooq atorlugu nuna erngup nukinganik tunngaveqarluni nukissiuuteqalissava?

Sermersuaq aakkiartorpoq. Sekundit tamarluinnaasa Kalaallit Nunaata imartaanut sermeq 6.000 tonsiusoq aniasarpoq. Sermip nunamiittup aatsitaa imeq nukissiornermut atorneqarsinnaavoq. Ullumikkut Kalaallit Nunaata nukissiuutinik atuinerata 60 procentia erngup nukinganeersuuvoq, illoqarfiit nunaqarfillu taama imminnut ungasitsiginngitsuuppata Kalaallit Nunaat tamarmi tamakkiisumik qangalili erngup nukinganik nukissiuuteqassagaluarpoq.

Siunissami aatsitassarsiornikkut suliniutit annertuut annertuumik nukissiuutinik pisariaqartitsiffiupput. Sulili sukkanerusumik akikinnerusumillu nukissiuutit dieselimik ikummatillit atorneqarsinnaapput erngup nukinganik nukissiorfinnut taarsiullugit, tassalu uungaannaq isiginiaraanni. Kalaallit piumasaqartariaqarpat nungusaataanngitsumik nukissiuutit atorneqassasut taamaalillutillu aatsitassarsiorniartut nunarsuarmut allamut nuullutik? Kalalalit Nunaat nunaava ineriartortitaq suliffissuaqarnikkut ineriartortitassaasoq tamanna avatangiisinut qanorluunniit kinguneqaraluarpat?

Nungusaataanngitsumik nukiup toqqorsinnaanissaa siammarnissaalu annertuumik teknikkikkut ilisimatusaatigineqarpoq. Immaqa Kalaallit Nunaata siulliulluni nunarsuarmi tamakkiisumik nungusaataanngitsumik nukissiuuteqalernissaanut piffissaq apeqqutaaginnalerpoq. Uungaannaq isigaluni dieselip atorneqarnissaa akuerigaanni CO2-mik aniatitsineq annertusissaaq, tassanili teknologi qanganeersoq atorneqassaaq Kalaallillu Nunaata akisussaassuseqartutut nunarsuarmik pisuussutinillu illersuisutut tusaamaneqarneranik innarliilluni. Dieselip atorneqarnissaa naaggaaraanni tamanna piffissaq sivikitsoq isigalugu aningaasaliiumasussanik annaasaqaataasinnaavoq, aammali nunarsuup sinneranut ersarissamik oqariartuutaalluni, nungusaataanngitsumik tunngaveqarluni suliffissuarnit kajungernarsilluni, teknologimi siuariarnermik pilersitsilluni taamaalillunilu siunissami kalaallit peqqissumik nungusaataanngitsumillu inuunissaannut pilersitseqataalluni.