Nunarsuarmiunut kingornussassanngortinneqartut siunissamut isumannaarneqarnissaat
UNESCO-p nunarsuarmiunut kingornussassanngortitaanni marluusuni tassaasuni Kujataa aamma Aasivissuit-Nipisat, nunarsuarmiunut kingornussassanngortinneqartut, allanngutsaaliuinissamut paasissutissanillu ingerlatitseqqinnissamut akisussaaffimmik nassataqarput. Akisussaaffik katersugaasivilerisut, nunarsuarminut kingornussassanngortitanut akisussaasut, suleqataasut soqutiginnittullu allat ataatsimoorlutik kivinniartariaqagaat.
UNESCO-p nunarsuarmiunut kingornussassanngortitai marluusut, Kujataa aamma Aasivissuit-Nipisat, Nuummi Nunatta Katersugaasivianit aamma Københavnimi Katersugaasivissuarmit ilisimatusartunit ukiuni sisamani misissuiffigeqqissaarneqarput, ilisimatusarfiit akimorlugit suliniummut “Activating Arctic Heritage”-mut atatillugu. Suliaq maanna naammassiartuaarneqalerpoq, tamannalu malunnartinniarlugu Københavnimi qanittukkut ataatsimeersuartitsisoqarpoq, Issittumi nunarsuarmiunut kulturikkut kingornussassanngortinneqartut aallaavigalugit.
Aviisi AG taama allappoq.
Tamatumani katersuutsinneqarlutik ilisimatusartut, katersugaasivilerisut, kingornussassanngortitani aqutsisut Nunatsinneersut, Danmarkimeersut, Norgemeersut, Sverigemeersut, Islandimeersut, Skotlandimeersut aamma Canadameersut Issittumi kulturikkut kingornussanik asseqanngitsunik, sunnertiasunilli allanngutsaaliuinermi ilisimasaminnik misilittakkaminnillu paarlaasseqatigiillutik.
Soorlumi Nunatta Katersugaasiviani Allagaateqarfianilu pisortap tulliata Christian Koch Madsenip aamma kingornussassanngortitani aqutsisut marluusut Paninnguaq Fleischer-Lyberthip aamma Aka Simonsenip oqaatigigaat, Nunatsinni Unescomit nunarsuarmiunut kingornussassanngortinneqartut aamma nunataasa uumassusillit pillugit ingerlatsineq, paasisanik ingerlatitseqqinnerit allanngutsaaliuinerillu aatsaat aallarnisarneqaleruttortut.
Piffissamik eqquilluartoq
Nunatsinni Ilulissat eqqaanni Kangia siulliulluni UNESCO-mit 2004-mi nunarsuarmiunut kingornussassanngortinneqarpoq tamatumalu kingorna Kujataa 2017-imi aamma Aasivissuit-Nipisat 2018-imi ilanngunneqarlutik, kingullertut marluk taaneqartut kulturikkut kingornussatut oqaluttuarisaanermullu pingaaruteqarnerat pissutigalugit toqqarneqarlutik. Nunap ilai marluk taakku akuerineqarput tassaasut nunarsuarmi asseqanngitsumik kulturikkut kingornussat, aammali allanngutsaaliorneqarnissaannut akisussaaffimmik malitseqarluni.
- Nunap ilaasa marluusut nunarsuarmiunut kingornussanngortinneqarnerisa takutippaat, Kalaallit Nunaat annertuumik asseqanngitsunik allanngutsaalineqartariaqartunillu kulturikkut kingornussassaqartoq. Toqqaasoqarneratali nalaani naammattunik inuttassaqartitsinngilagut aningaasassaqaratalu imaluunniit toqqaanerit kingunerinik suliassat annertuut aamma suliassaalersut kivissinnaanissaannut naammattunik ilisimasaqarata, Christian Koch Madsen oqaluttuarpoq.
Aviisimi AG-mi atuarnerusinnaavutit. Aviisi uani pissarsiariuk:
