Nunarsuup aserornissaanik siulittuisut 93-it Kinami tigusarineqartut
Nunarsuup aserornissaanik siulittuisut Kinami malersorneqarput, ilaatigullu angut savilersorluni atuartunik 23-nik saassussisoq tigusarineqarluni
Inuit 93-it nunarsuup aserornissaanik tusatsiakkanik siammarterisutut unnerluutigineqartut Kinami politiinit tigusarineqarput.
Tamatuma saniatigut angut nunap immikkoortuani Henanimi savilersorluni saassussinermini atuartunik 23-nik ikiliisoq oqartussanit tigusarineqarpoq.
Angut atuarfimmut iserluni atuartunik saassussigami nunarsuup aserornissaanik tusatsiakkanit sunnerneqarsimagunarpoq, nutaarsiassaqartitsivik Xinhua allappoq. Tamanna tallimanngornermi pivoq, saassussisoqarneranilli paasissutissanik oqartussat tunuarsimaarutiginnissimapput.
- Maannamut paasiniaanermi paasineqarpoq Min Yongjun sivitsortumi noqartarnermik nappaateqarsimasoq nunarsuup aserungajalerneranik tusatsiakkanit eqqarsartaatsimigut sakkortuumik sunnerneqarsimasoq, Xinhua allappoq.
Læs "Kinesiske virksomheder køber op i Europa"
Inuit nunarsuup aserornissaanik siulittuutinik siaruarterinertik pillugu tigusarineqartut 93-it akornanniipput upperisarsioqatigiinnut imminnut "Guuti Ajugaqanngitsoq"-mik taagortunut ilaasortat.
Taakkua tigusarineqarput naqitaaqqanik ullup eqqartuunneqarfissap qanilliartorneranik imaqartunik agguaassinerminni - siulittuut tamanna mayaindianerit qaammasiutitoqaata naalerneranik toqqammaveqarunarpoq.
- Upperisarsioqatigiinnut immikkoorniartunut ilaasortat taakkua qanittukkut mayat qaammatisiutaat tunngavigalugu nunarsuup aserornissaanik siulittuut ilannguffigaat oqarlutillu decembarip 21-aniit ulluni pingasuni seqinneranilu innaallagiaqarnavianngitsoq, Xinhua allappoq.
Kina nunarsuup aserornissaanik siulittuuteqartunut pingaartumillu "Guuti Ajugaqanngitsoq"-mut ilaasortanut akiuinialerpoq taakkua "Uumasorujuup Aappaluttup" - kommunistpartiiata - sorsunneqarnissaanik kaammattuisimammata.
Partii inuiaqatigiinni patajaassutsimik ataavartitserusulluinnarpoq tusatsiakkanillu tamakkuninnga unitsitsiniarsaraluni, tusatsiakkalli internettikkut siaruaakkiartupiloorput.