Nunarsuup kaavinnera allanngorsinnaavoq
Inuit pilersitaannik silaannaap kissatsikkiartornerata kingunerisaanik nunarsuup kaavinnera ukiut untritillit makkua ingerlaneranni 1,5 meterinik nikissinnaavoq.
Californiami Jet Propulsion Lab-ip misissuinera tunngavigalugu taamatut tupaallannartumik naliliisoqarpoq.
Nunarsuup immini kaavinnermini oqimaaqatigiiffia aalaakkaasuunngilaq. Taanna pingaartumik silaannaap allanngornerinit immallu ingerlaartarfiinit sunnigaasarpoq, tamannalumi nutaajunngilaq. Massakkulli ilisimatuut immat, silap kissakkiartorneranik peqquteqartumik, allisimanerat malugisimavaat, tamannalu nunarsuup kaavinneranut sunniuteqarsinnaavoq, taamaalillutillu nunarsuup isuini magneteqarfiit (Qalasersuarmi aamma Sikuiuitsumi Kujallermi, nuts.) nikissinnaallutik.
Immat allinerisa nunarsuup kaavinneranik sunniinerannut pissutaasoq tassaavoq, nunavissuit nunataat immamut itinerusumut annikitsumik illuassammata. Qalasersuup illuariartornera Alaskap tungaanut illuariartortoq ilisimatuut paasissutissaataanni takuneqarsinnaavoq.
Taamaattorli Kalaallit Nunaata sermersuata aakkiartornera nunarsuup kaavinneranut quleriaammik annertunerusumik sunniuteqarpoq, immat allinermikkut sunniuteqarnerannut sanilliussilluni, ilisimatusarnermik suliallit naqissuusiipput. Kalaallit Nunaata sermersua oqimaatsupilorujussuuvoq, taannalu peerutissappat taava tamanna nunarsuup kaavinnerata qanoq inneranut annertuumik sunniuteqassaaq.