Nunasiaataatilittut nipeqarpoq
Demokraatit siulittaasorisimasaata Per Berthelsenip siumumeersup konservative-t akalaallit nunaannut tunngasunut oqaaseqartartuata Per Ørum Jørgensenip kalaallit meerartaasa atugaat pitsaanerulersinneqanngippata ataatsimoortumik tapiissutit peerneqarnissaannik siunnersuutaa akuerisinnaanngilaa.
Per Berthelsenip Per Ørum Jørgensenip De Konservative-neersup oqaaseqaatai tupigusuutigai.
– Oqaaseqaatit piviusunut tunnganngilluinnarput, assut nunasiaateqarpallattumik nipeqarlutik pifissanngilluinnartukkullu oqaatigineqarlutik, aammalu danskit politikkikkut partiiannit allarluinnarmiit oqaasissaagaluarlutik, Per Berthelsen siumumeersoq tusagassiorfinnut nalunaarummi allappoq.
Taassuma tupigusuutigaa oqaaseqaat De Konservateve-ni ilaasortamit Kalaallit Nunaanni partiimik tapersersorteqartumit aninneqarnerat. Konservative-t Demokraatillu suleqatigiipput.
– Ataaserli maanna takusinnaalerpara, tassa danskit kalaallit nunaanni partiimik Demokraatinik suleqateqalersimanerannut peqqutaasoq, tassalu tamarmik Kalaallit Nunaannut, taassuma naalakkersuisuinut innuttaanullu nikassaallutik isiginninnerat, partiilu taakku utertuartumik taamatut nalunaartarput. Tamanna akuerisinnaanngilluinnarpara, Per Berthelsen oqarpoq.