Nunat Avannarliit Siunnersuisoqatigiiffiat: Ukiorpassuit naligiinnerunissamik sorsuutiginninneq angusaqarfigineqarsinnaalerpoq
Kalaallit Nunaat Savalimmiullu kiisalu Åland Nunat Avannarliit Siunnersuisoqatigiiffianni naligiinnerusumik inissisimasoqarnissaanik tamaviaaruteqarput. Maanna piumasaqaat naammassiniarneqalerpoq, Lars Christian Brask (LA)-p siunnersuutaa ilalerneqassappat.
Maani nunatsinni Naalakkersuisut arlaleriarlutik erseqqissaasarput, Nunat Avannarliit Siunnersuisoqatigiiffianni (Nordisk Råd) nunatta peqataanera nalilersoqqinneqartariaqartoq, ukiorpassuarni naligiinnerusumik ingerlatsisoqarnissaanik tamaviaarutiginninneq anguneqarsinnaanngimmat.
Maannali Danmarkip aallartitaasa siulittaasuat, Lars-Christian Brask (LA) ikiuunnialerpoq Kalaallit Nunaata, Savalimmiut aammalu Ålandip siunnersuisoqatigiiffimmi tassani sunniuteqarnerunissamik naligiinnerusumillu suleqatigiinnissamik piumasaqartuarnerat anguneqarsinnaaqqullugu.
Danmarkip killiffik annaassinnaavaa?
Naalakkersuisut arlaleriarlutik ersarissigaluttuinnartumillu apeqqusersuisarput Kalaallit Nunaata suleqatigiiffimmi tassani peqataanera naapertuunnersoq, tassami nunarput peqataagaluarluni sunniuteqarsinnaanera annikitsuararsuugami.
Apeqqummut tassunga tunngatillugu pisoq kingulleq tassaavoq nunatta nunanut allanut, sillimaniarnermut illersornissamullu periusissiaa 2024-2033 pingasunngorneq 21, februar saqqummiunneqarmat periusissiatigut tassuuna isumaqatigiissuteqartut naqissusiimmata:
"Nunatta salliutissavai suliassaqarfiit ilaatigut suleqatigiinnermut nukissaqarfiusut, aammali Nunatta tamakkiisumik allanut naligititaalluni, nammineq erfalasuni aallartitanilu atorlugit ilaasortaaffigisai. Oqallittarfiit nunatta toqqaannartumik sunniuteqarfigisinnaanngisai tunulliunneqartassapput. Nunatta oqartussaaffigisanut attuumassuteqartut sammineqartillugit nunarput pisortatigoortumik aalajangeeqataasinnaassuseqartilluni aatsaat peqataasassaaq.
- Nunat avannarliit ilumut salliutinneqassanersoq paasilluarumallugu Nunarput suleqatigiinnermik nalilersuissaaq. Nunatta peqataasarnissaa pisortatigoortumik aalajangeeqataasarnissamik pisinnaatitsissuteqarnissamik tunngaveqassaaq."
Siulittaasoq nutaaq anguniakkat nutaat
Pissutissaqarpoq ilimatsaatissallugu Danmark eqeertitaasimasoq, nunatsinnut nassuerutiginninnermik kingunilimmik pisoqanngippat, taava Danmarkip aammalu Nunat Avannarliit tamarmi Kalaallit Nunarput suleqatissatut puiguinnartariaqalersinnaagaat pillugu.
Tassami tallimanngornermi. periusissiap saqqummiunneqarneranit ullut marluk qaangiuterianngitsullu Nunat Avannarliit Siunnersuisoqatigiiffianni siulittaasunngortoq nalunaaruteqarpoq nammineq sulissutiginiarlugu Kalaallit Nunaata, Savalimmiut aammalu Ålandip ukiorpassuarni piumasarisaat naammassiniarneqassasoq.
Sisamanngornermi 29. februar Danmarkip Nunani Avannarlerni Siunnersuisoqatigiit aallartitaasa eqqartussavaat qanoq ililluni Savalimmiut Kalaallillu Nunaat Nunat Avannarliit Siunnersuisoqatigiiffianni naligiinnerusumik inissisimalersinnaanersut. Tamanna pisussanngorpoq Savalimmiut Kalaallillu Nunaata Nunani Avannarlerni aallartitaasa kissaateqarnerat tunngavigalugu, taamatuttaaq Savalimmiut Inatsisartuisa lagtingip kiisalu Kalaallit Nunaata Inatsisartuisa kissaataat malillugit, taakkulu tamarmik eqqartueqatigiinnissami aggersarneqassapput. Ataatsimiinnermi Nunat Avannarliit Inatsisartutigut suleqatigiinneranni nunani avannarlerni nunanisut allanisut naligiimmik inissisimallutik siunissami peqataasalernissaat qulakkeerneqarsinnaanersoq.
- Uannut, Nunani Avannarlerni Danmarkip aallartitaasa siulittaasuattut nutaajusutut pingaaruteqarpoq, Savalimmiut Kalaallillu Nunaata naligiinnerusumik inissisimallutik nunani avannarlerni suleqatigiinnermi kissaataat tusaassallugu. Kissaat taanna amerlasuutigut kivitinneqartarpoq angerfigeqatigiissutit nunallu tunngaviusumik inatsisai innersuussutigineqaannartarlutik. Taamaammat siunnersuummik saqqummiussaqarpunga, Nunat Avannarliit Siunnersuisoqatigiiffiata ilumini inatsisaasa aammalu suleriaaseq pillugu malittarisassaasa allanngortiallannerisigut nunat taakku naligiinnerusumik inissisimalersinnaammata, Lars-Christian Brask (LA), Danmarkip Nunani Avannarlerni aallartitaasa siulittaasortaavat oqarpoq.