Nunat tamalaaneersut Narsami isumasioqatigiipput
Kalaallit Nunaanni Issittumilu nunap pissusianik avatangiisinillu nunat tamalaat suliniaqatigiiffiisa ulluni pingasuni ataatsimiinnerat sapaatiummat Narsami ammarpoq.
- Siusinnerusukkut allorniusat sanimukartut 60-iannit annarpasinnerusut tamarmik silarsuarmi allamiissimagaluarput. Maanna taamaakkunnaarpoq. Maanna silarsuarmi assigiissumi inuulersimavugut.
Taamatut oqarluni Finn Lynge sapaatiummat isumasioqatigiissitsinermut, Earth Charterimik (Nunarsuarmut Angerfigeqatigiissut) taaneqartumik aallaavilimmut tikilulaqqusivoq. Finn Lynge Rie Oldenburg peqatigalugu Earth Charterip Narsami immikkoortortaqalernissaanik isumasioqatigiinnissamillu suliniuteqartuuvoq, taannalu marlunngorpat nunat tamalaat Earth Day-annik (Nunarsuup Ulluanik) kinguneqassaaq.
Isumasioqatigiinneq aallartippoq Aningaasanut Nunanullu Allanut Tunngasunut naalakkersuisup Aleqa Hammondip, Siumut, oqalugiaataanik nassiunneqarsimasumik. Tassani erseqqissarneqarpoq Kalaallit Nunaat qanoq isilluni nunat tamalaat silap pissusiata allanngorarneranik oqaloqatigiiffittarfianni peqataanersoq.
Akunnattoorfik
Oqalugiarnermi tamatuma saniatigut Kalaallit Nunaata maanna akunnattoorfia tikkuarneqarpoq: Illua´tungaatigut CO2-mik aniatitsinerup annikillisarnissaanik nunat tamalaat isumaqatigiissutaannik malittarisassaannillu malinnittussaajutigaluni aappaatigut aningaasarsiornernini ineriartortinniarlugu, aatsitassarsiornermi uuliamillu ujaasinermi aningaasaliisut nunanit tamalaaneersut pilerinnilersinniartussaallugit, qularnanngitsumik Kalaallit Nunaata CO2-mik aniatitsinerata annikillisarneranut peqataasussaanngitsut. Suliffissuaqarfiilli Kalaallit Nunaanni nunap iluanik soqutiginnittoorujussuupput, naalakkersuisunut ilaasortaq tikkuaavoq:
- Taamaattumik apeqqutaaginnarpoq piumasaqaatit suut naalakkersuisumma aningaasaliisunut naammasseqqussanerai, aatsitassanik ujaasinermut imaluunniit suliffissuaqarfinnik nutaanik ineriartortitsinissamut akuersissutinik tunisigaangatta, Aleqa Hammondip oqalugiaataani, Finn Lyngemit atuarneqartumi allassimavoq.
Isumasioqatigiinnermi peqataasut 50-t missaanniipput, tamakkualu sapaatiummat ullaap tungaani professor Brendan Machey-p oqalugiaata tusarnaarpai, taassuma oqalugiaatigimmagu avatangiisit qanoq issusiat, nunarsuarmit tamarmit isigalugu. Mackey Internationale Earth Charter Comissionimi ilaasortaavoq, ilanngullugulu oqaluttuaralugu Nunarsuarmut Angerfigeqatigiinnermi tunngaviit. Tamatuma saniatigut isumasioqatigiit kattuffimmik Green Cross Internationalimik ilisaritinneqarput. Sapaammi ualikkut nunatsinnit isiginninneq saqqummiunneqassaaq, tassa Namminersornerullutik Oqartussat nunalerinermut siunnersuisoqarfianni pisortap Kenneth Høeghip oqaluttuarissammagu silap pissusiata allanngorarnera aammalu kujataani ivikkanik naatitsisarneq.
Tamatuma kignorna peqataasut suleqatigiissitalianut agguarneqassapput, siunertaavorlu angusaminnik marlunngorpat saqqummiussissasut.
Naalakkersuisunut ilaasortap Aleqa Hammondip tuluttut oqalugiaataa spaltemi talerperlermi downlode-rneqarsinnaavoq.