Nunatsinni 80-ikkunni taxartartuusimaneq pissutaalluni siusinaartumik utoqqalinersiuteqalersinnaannginneq
Poul Erik Møller siusinaartumik utoqqalinersiaqalerusukkaluarpoq. Tamannali angussaguniuk ukiut 40-t matuma siorna ukiumoortumik nalunaarsuutini aningaasarsinermullu uppernarsaatini takutissinnaasariaqarpai. Maannalu taakku nassaarisinnaanngilai.
66-nik ukiulik Poul Erik Møller 17-nilli ukioqarluni sulisalerpoq.
Taamaattumik danskit naalakkersuisuisa qineqqusaarutigisimasaat, tassa Arne-pensioneqarnissamut pisinnaatitaaffeqarpoq. Ukiunili 20-ni Nuummiissimanini pissutigalugu siusinaartumik utoqqalinersiaqalersinnaanngilaq.
Poul Erik Møller Danmarkimi maannakkut najugaqarpoq, 1983-imit 1989-imut Kalaallit Nunaanniissimanini pissutigalugu siusinaartumik utoqqalinersiaqalersinnaanngilaq.
ATP-ip atorfeqarsimanermut sivisussusianik nalunaarsuiffiani tamanna erserpoq.
Kalaallit Nunaanni sullissiviit ATP-imut akilersuisarsimasut ikitsunnguunerat ajornartorsiutaavoq. Poul Erik Møller aamma ATP-mut akilersuinikuunngilaq. Ukiut 40-t matuma siorna sulisimanini uppernarsarsinnaasariaqarpaa, akileraartarnermut uppernarsaatini nassaarisinnaanngimmagit tamanna periarfissaanngilaq.
- 1990-imit Kalaallit Nunaanni sulisimaninnit akileraartarnermut uppernarsaatikka aatsaat toqqortalerpakka. Periarfissaasut tamarmik apersornikuugaluarpakka. Danmarkip Allagaateqarfia, Kommuneqarfik Sermersooq aamma Kalaallit Nunaata Allagaateqarfia aperinikuugaluarpakka, sulisimaninnulli uppernarsaatit toqqorneqarsimanngillat, Poul Erik Møller oqarpoq.
Inuit ataasiakkaat pillugit paasissutissat toqqorneqarneq ajortut
1980-ikkunni lastbilertartuullunilu taxartartuuvoq. Aamma suliffiginikuusani aperinikuugaluarpai, uppernarsaatilli pisariaqartut nassaarineqarsinnaasimanngillat. Ukiummi tallimat tikillugit taamaallaat paasissutissat toqqorsimaneqarsinnaapput.
Siusinaartumik utoqqalinersiaqalernissaq tikissappagu Poul Erik Møllerip ajornartorsiutit pingasut paaseqqaartariaqarpai.
ATP-ip paasissutissaatai Danmarkip kisimi atortarai nassuiarpaa, Kalaallit Nunaannilu suliffeqarfiit ikitsuinnaat ATP-mut akiliisarput. Akileraarsimanermut uppernarsaatit ukiut tallimakkaarlugit Namminersorlutik Oqartussat toqqorterisarpoq, taamaattumik ukiut 40-t matuma siorna akileraarsimanermut uppernarsaatit kiisalu akissarsisimanermut uppernarsaatit toqqorsimanngikkaanni uppernarsaatit nassaarinissaat ajornakusoorluinnarpoq.
Arlaqartut assingusumik ajornartooqqasut
Taamatut inissisimasoqarnera Aaja Chemnitzip (IA) ilisimavaa, danskit beskæftigelsesministerianut Peter Hummelgaardimut ajornartorsiut saqqummiunnikuullugu. Kalaallit Nunaannut immikkut ittumik aaqqiissuteqartoqarnissaa sulissutigineqanngitsoq ministerip ilisimatitsissutigaa.
Taamatut akissuteqarfigineqarnini Aaja Chemnitzip isoraa. Taamatummi ministerip akinera pissutaalluni Poul Erik Møller siusinaartumik utoqqalinersiaqalernissamut neriuutaa piviusunngornaviarunanngilaq.
- Kalaallit Nunaanni sulisimasut uattut inissisimasut Facebookikkut takunikuuakka.