Nunatsinni illoqarfiit annersaata aappaat kigutit nakorsaanik soqanngitsoq
Kigutilerisut Qullersaata Helena Holmip Sermitsiaq.AG-mut ilisimatitsissutigaa Sisimiuni piffissami januaarip arfineq-aappaaniit marsip aallaqqaataata tungaanut kigutilerisoqassanngitsoq. Sisimiunili innuttaasut kigutileriffimmukarnissaminnut toqqissisimasinnaasut ilisimatitsissutigaa.
Illoqarfik 5.412-inik innuttaassusilik maannakkorpiaq kigutinut nakorsaqanngilaq.
Sisimiuni kigutileriffimmut iseraanni kigutit nakorsaannik takusassaqanngilaq. Kigutilerisut qullersaata, Helena Holmip, oqaatigaa februaarip arfineq-aappaannili kigutit nakorsaannik sulisoqanngitsoq, nakorsassaaleqinerlu marsip aallaqqaataata tungaanut pissasoq.
Innuttaasulli toqqissisimallutik kigutileriffiliarsinnaassasut nassuiaatigaa:
- Sisimiuni innuttaasut toqqissisimallutik kigutileriffiliarsinnaapput. Sulisugut pikkorissut suli sulipput, tamat siunnersorneqarnissaminnut ilitsersorneqarnissaminnullu kigutileriffimmut saaffiginnissinnaapput. Ilumoorpoq kigutit nakorsaat februaarip ulluisa arfineq-aappaanni soraarsimasoq, kisianni marsip aallaqqaataaniit nutaamik atorfinittoqartussaavoq. Aamma apriilip qaammataani marlunnik kigutit nakorsaannik tikittoqartussaavoq, Helena Holm Sermitsiaq.AG-mut oqarpoq.
Sulisut kigutit nakorsaannit siunnersorneqartut
Sisimiuni innuttaasut kiguserippata, kigutileriffimmi sulisut kigutit nakorsaannit illoqarfimmi allameersunit siunnersorneqassapput.
- Napparsimasup pisariaqartitsiffia erseqqippat, erseqqarissumillu oqaatigineqarsinnaappat sulisut pikkorissut kigutit nakorsaannit illoqarfimmi allameersunit siunnersorneqarsinnaapput, kigutilerisut qullersaat, Helena Holm nassuiaavoq.
Taassuma ilanngullugu ilisimatitsissutigaa Sisimiuni kigutit nakorsaannik marsip aallaqqaataani atorfinittoqassasoq.