Nunatsinni nutaamik pisoqarnera Baltikumitut ippoq
Qallunaap pissutsinut malinnaasup nalilerpaa piffiit nutaat Kalaallit Nunaanni atugaalersut. Taassuma pissutsit Sovjetunionip ajalusoornerata kingorna Baltikumimi pissutsinut sanilliuppai.
Taamatut allappoq politiken.dk.
– Ulluni unnuanilu makkunani Kalaallit Nunaanni pisut arlalippassuartigut Baltikumimi pisimasumut eqqaanarput. Kinguaariit nutaat inuusuttullu maannakkorpiaq pissaanermik tiguserusupput, kingusinnerusukkuunngitsoq, Erik Lund, Danmarks Medile- og Journalisthøjskole-meersoq oqarppoq. Taassuma Kalaallit Nunaat ukiorpassuarni sammisarisimavaa, ilaatigullu P1-imi aallakaatitassiami Orientering-imi nunatsinni pissutsit sammisarsimallugit.
Namminersulernissaq, amerlanerussuteqarluartunik akuersissutigineqarluni ullormi inuiattut nalliuttorsiorfimmi junip 21-ianni eqqunneqartussaq, sioqqullugu qinersisartut saleerusupput, Erik Lund naliliivoq.
– Politikkimi saliinersuaqarpoq. Qinersisartut taamatorsuaq mamianartuliornernik amerlanerusunik perusunngillat, taanna politiken.dk-mut oqarpoq.
Qinersineq inunnik kinguaariinnillu samminnittoqarpoq, politikki pinerunagu, Erik Lund naliliivoq.
Taassuma isaanit isigalugu 24-inik ukiulik Juliane Henningsen IA-meersoq nunatsinni nutarteriartornermi siuttuuvoq.
– Qinersisartut namminersulerusupput politikereqarlutik pisimasutoqqanik artukkerneqarsimanngitsunik, assersuutigalugu pisortat aningaasaataannik namminerlu aningaasaatinik akulerussuutsitsinngitsunik, Erik Lund oqarpoq.