Nunatsinni politiit pisortaat: Aallaasit pillugit inatsit sukaterneqartariaqarpoq
Sapaatip akunnerini kingullerni marlunni Nunatsinni Politiit aallaasersornermut tunngasunik 18-nik suliaqartariaqarsimapput, kingulleq pisoq Tasiilami pivoq. Pisuni piniarnissamut tunngassuteqanngill imminulli aamma/imaluunniit inoqatinik ulorianartorsiortitsineq pineqarpoq.
Nunatsinni Politiit pisortaat, Bjørn Tegner Bay naapertorlugu sapaatip akunnerini kingullerni pisimasorpassuit ersersitsipput aallaasit pillugit inatsisip sukateriffigineqarnissaa pisariaqarluinnartoq utaqqissunneqaqqissinnaajunnaartorlu.
- Ukiuni kingullerni tallimani-arfinilinni aallaasit pillugit inatsisip sukateriffigineqarnissaanut utaqqinikuuvugut. Utaqqinitsinni aallaasersornermut tunngasut politiit isumagisariaqartagaat amerligaluttuinnarnikuupput. Tamatuma malitsigisaanik politikerinut pimoorussamik sulissutiginnittoqarnissaanik kaammattuisariaqalerpugut, tassami utaqqeqqissinnaajunnaarpugut inatsisip pineqartup sukaterneqarnissaanut, Politiit pisortaat Bjørn Tegner Bay Sermitsiaq.AG-mut oqarpoq.
Aallaasinut toqqorsivik piumasaqaataasariaqartoq
Bjørn Tegner Bay-ip kissaataa siulleq pingaarnerpaarlu tassaavoq paarnaartartumik aallaasinut toqqorsiveqarnissamik piumasaqaateqartoqalernissaa.
Taamaattorli aamma taassuma nassuerutigaa toqqorsivik taamaattoq akisummat angerlarsimaffiit aallaasillit tamarmik imaaliallaannaq pisisinnaanngitsut. Taamaammat kissaataata aappaa tassaavoq, minnerpaamik pisussaaffiliisoqartariaqartoq aallaasit nusuttaataasa paarnaaqqasarnissaat imaluunniit cykilinut paarnaarsaataannarluunniit aallaasit atorneqarsinnaajunnaarlugit paarnaarsisinnaasunik, taamaalilluni isumannaarneqarluni aallaammik piginnittup kisimi paarnaarsaammik ammaasinnaanissaa:
- Pisuni arlalissuarni inuit kamallutik namminneq aallaasiginngisaminnik aallertarput, nalunnginnamikku nalunngisamik aallaasitik sumiitittarneraat aammalu nalunnginnamikku imassai aamma sumiinnersut, tassami ullumikkutut inatsisit itsillugit allamik piumasaqaateqartoqanngilaq aallaat imassaalu immikkut ilineqassasut. Inatsisaanngilaq imassat allamut toqqorneqassasut, taamaalilluni amerlasuutigut aallaat imassaalu ataatsikkut tigoriaannanngorlugit ilineqarsimasarput, soorlu assersuutigalugu quimi imaluunniit umiatsiami.
Aallaasit minnerpaamik paarnaartarnissaannik inatsisitigut piumasaqaateqalernerup saniatigut, aallaammik piginnittut pisussaaffilerneqartariaqarput nusuttaataat paarnaarneqartassasut imaluunniit aamma silusaatai peerneqarsimassasut, Bjørn Tegner Bay kaammattuuteqarpoq.
- Taamatut sukaterisoqarpat aallaasip inuttaasa pilersitaannik suli ulorianartorsiortitsisoqarsinnaavoq, taamaattorli taamaaliornikkut aallaasinik tillinniarsimanikkut ulorianartorsiortitsinerit pinngitsoortinneqarsinnaalissapput aamma minnerunngitsumik meeqqat aallaasinik igeriaannarnik tiguseriarlutik pinnguarinnissinnaanerat pinngitsoortinneqarsinnaalissaaq, tamannalu annertoorujussuarmik oqilisaataassaaq ulorianartorsiortitsisoqartarneralu annikillisarneqassaaq, Politiit pisortaat tikkuaavoq.
Aallaasisiniassagaanni 18-liisimanissaq piumasaqaataasariaqarpoq
Meeqqat pineqartillugit Politiit pisortaat erseqqissaavoq meeqqat aallaammik pinnguarinnitsillugit ulorianartorujussuusoq, tamannalu politiit ataasiaannaratik misilittagaqarfigivaat. Taamaammat meeqqat aqqaneq marluinnarnik ukioqarlutik aallaammik pisisinnaanerat atuisinnaanerallu sukateriffigineqartariaqartoq aamma piumasarineqarpoq:
- Aallaasit qanoq ulorianarsinnaatiginerinut meeqqat malussarniutimikkut inerisimanngitsorujussuupput, tamanna aamma ajoraluartumik misilittagaqarfigaarput. Meeqqat aallaaserlutik qaqqaliartut ataasiaannarata naammattoortarpagut. Tassa politiit meeqqanik aallaaserlutik qaqqaliartunik takunnissinnaasarput. Politiilli qanoq iliuuseqarsinnaanngillat meeqqat aqqaneq marlunnik ukioqalereersimasarmata. Meeqqat aqissiliarnerarsinnaasarput, kisiannili aqissinik naammattoorsinngitsoorlutik pikkunaalliulerunik susoqassava? Meeqqat eqqorniagaqarlutik aallaaqattaalertarput, taamaattoqaraangallu aallartoorfiginnissinnaaneq navianaqisoq qanittuararsuanngortinneqartarpoq. Taamaammat pinngitsoorani meeqqat kisimiillutik aallaasilerisinnaanerat allaallu aallaasisiniarsinnaanerat sukateriffigineqartariaqarpoq, uangalu isumaga naapertorlugu naapertuuppoq 18-nik ukioqalereersimanermi aatsaat aallaasisiniarsinnaaneq atuutilersinneqartariaqarpoq. Assersuutigiinnarlugu biilersinnaassagaanni 18-nik ukioqalersimanissaq piumasaqaataavoq, taava sooq piumasaqaataassanngila aallaasisissagaanni 18-nik ukioqalersimanissaq? Politiit pisortaat aperivoq.
Aallaasinik eqqarasuartaatinik inerteqqutaalluinnartariaqarput
Kalaallit Nunaanni politiit assut ajornartorsiutaasutut isigaat inuussutissarsiutigalugu piniartut aallaasinik eqqarasuartaatinik (halvautomatisk våben) killeqanngitsumik pisisinnaanerat.
Tegner Bay isumaqarpoq, taamatut akuersissuteqarnerup malitsigisaanik inuussutissarsiutigalugu piniartuunngitsut aallaasinik taamaattunik pissarsisinnaanerat ajornanngitsuararsuanngorsimasoq. Taassuma aamma tikkuarpaa piniagassat ikittuaraannaat aallaammik taamaattumik piniarneqaqqusaasut:
- Ajoraluartumik naammattoorsisarpugut inuussutissarsiutigalugu piniartuunngitsut aallaasinik taamaattunik pissarsisimasartut. Tamakku naammattooraangatsigit soorunami arsaarinnissutigisarpagut, Bjørn Tegner Bay erseqqissaavoq nangillunilu:
- Kingullermik aallaammik taamaattumik ulorianartorsiortitsisoqarnera Narsami pivoq, tassani inuk aallaammik eqqarasuartaammik pissarsisimariarluni inuit sussuseqanngitsut ersiorterujussuarpai ulorianartorsiortillugillu. Aallaasillu taakku naqiinnarlugit eqqarasuartartut ulorianartorujussuupput, aallaammimmi taamaattumik aallaasersortut naqiinnarlugit immeqattaarnagit qanorsuaq aallaasinnaapput. Isumaga naapertorlugu aallaasit taamaattut pisiarissallugit, pigissallugit atussallugillu inerteqqutaalluinnartariaqarput, inerteqquteqalernissarlu nukingiunneqartariaqarpoq, Nunatsinni Politiit pisortaat Bjørn Tegner Bay naggasiivoq.
Naalakkersuisut oqaaseqartinnissaat Sermitsiaq.AG-mit sulissutigaarput.