Nunatta Karsiata naatsorsuutaa sammisani assigiinngitsuni marlunni naatsorsuuserisumit isornartorsiorneqarpoq
Namminersorlutik Oqartussat naatsorsuusiortarnermut suleriaasiani naatsorsuusioriaatsimi eqaallisaaneq digitaliseeriinerlu ingerlalluarput. Aaqqittarialittut oqaaseqaatigineqarsimasuni 15-iusuni, siorna saqqummiunneqartuni, arfineq-marluk iluarsineqareersimapput. Nunatta Karsiatali naatsorsuutaani 2017-imoortumi aaqqitassatut isorineqartut marluk ilanngunneqarsimapput.
Kukkunersiuinermut Ataatsimiititaliap Nunatta Karsianut naatsorsuutit 2017-imoortut pillugit isumaliutissiissutini saqqummiuteqqammerpaa, taakkunani ilanngunneqarsimavoq avataanit kukkunersiuisutut toqqarneqarsimasoq – Nunatta Karsianut kukkunersiuisoq – marlunnik kukkunersiuinermi oqaaseqaatiliortariaqalersimapput.
- Kingusissukkut iluarsiissuteqartarnerit amerlassusii ernumanartinneqartut
- Nakkutilliilluni iliuusaasarsimasunut uppernarsaatit naammaginanngitsut
Kukkunersiuinermut Ataatsimiititaliap isumaliutissiissutaani kalaallisuumi 49-nik qupperneqartumi atuarneqarsinnaavoq, IT-mi atortorissaarutip – ERP- ukioq manna atuutilertussaagaluartoq assut kinguaattoorfiusoq.
- Nunatta Karsiata kukkunersiuisuata oqaaseqaatai arlallit atortorissaarummit taassuminnga aaqqiivigineqarsinnaagaluarput, Kukkunersiuinermut Ataatsimiititaliaq allappoq.
Annertuumik kukkuneqanngitsut
Ukioq naatsorsuiffik 2017 ataatsimut isigalugu ”naatsorsuutit pingaarnerusuni tamani eqqortuusut, tassa pingaarutilitsigut kukkunertaqanngitsut amigaateqaratillu” Nunatta Karsiata kukkunersiuisua nalilerpaa.