Nunatta Kitaani ullorissap anaata itersaliaa nunarsuarmi anginerpaaq pillugu uppernarsaatit nutaat
Maniitsumi ullorissap anaanit itersaliaasorinninneq, ukiunik 3 milliardinik pisoqaassuseqassangatinneqartoq, ujarassiorlutik ilisimatuut ilimageriigaat misissuinerit nutaat uppernarnerulersippaat, taamak GEUS allaaserinnippoq.
Maniitsup sannaanik taaneqartartoq, qangarsuaq ullorissap anaata nakkarneraneernersoq nunalluunniit sajunneraneernersoq ukiorpanni oqallisaasarpoq.
Sannaq ammalortuuvoq 100 kilometerisullu diameterit missaannik angissuseqarluni.
Sannap ukiunik 3 milliardit missaanik pisoqaatigisutut itersaliaaneranik eqqoriarneqarneranik tapersiisumik, ilisimatusartut misissuinermik saqqummiussaqaqqammerput, taannalu 500 kilometerisut diameterinik angissuseqarsimasinnaavoq, piffissalli ingerlanerani nungullarsimalluni.
- Ilumooruni, ullorissap anaata itersaliaanit sannani nunarsuarmi anginersaallunilu nutaannginnerpaajuvoq, GEUS (Naalagaaffiup Danmarkimi aamma Kalaallit Nunaanni nunat sananeqaataannik misissuinermik ingerlatsivia) inernerit pillugit allappoq.
Aligunik misissuisut
GEUS aallaavigalugu, uppernarsakkamit ullorissap anaata nakkarneranit itersalianit, sannanik angisuunik sisamanik pinngortunit, zirkoninit aligut 3.400-nit amerlanerusut ilisimatusartut missorpaat.
Naleqqiussiniarlutik Norgemi Italiamilu nunap sajorujussuarnikuuneranit ullorissap anaata nakkarfiginikuunngisaannit zirkoninik aamma misissuipput– minnerunngitsumillu Nunatsinni Maniitsup sannaanit aamma misissuillutik.
Ilisimatusartut aliguni assigiinngissutsit sumiissusersivaat, ullorissap anaanit nunallu sajunneranit sunniutit immikkoortissinnaaniassagamikkit.
Nunarsuarmi itersalianit ilisimaneqartut anginersaat nutaannginnersaallu
Adam Garde, GEUS-imi ilisimatusartoq soraarneq misissuinermi ilisimatusartut ilagaat, oqarporlu nunarsuarmi ullorissap anaata itersaliaanik annersaasumik pisoqaanersaasumillu Nunatta kitaaniittoqarneranik, ujarassiornermik ilisimatusarnermik aallaaveqartumik Kalaallit Nunaat maanna tunngavilersueqqissinnaanngortoq.
Adam Garde aallaavigalugu, nunarsuup pinngoqqaarnera nunarsuullu qalippaa pillugit paasinnikkusunneq pillugu ujarassiornikkut pingaarutilimmik sumiiffik soqutigineqalerumaarpoq.
- Tamanna ilutigalugu itersaliat qanganisarujussuit sinnikuisa suussusersinissaannut periutsimik sakkumik qularnaatsumik ujarassiornermik ilisimatusarnermi peqalerpoq, GEUS allappoq.
Adam Gardep saniatigut misissuinerni ilisimatusartut nutaanillu uppernarsaataasinnaasunik naammassinneqataasut tassaapput Leif Johansson, Nynke Keulen, Anja Schreiber aamma Richard Wirth.