Nunatta nunatsinni nalunaaqutaqatigiinnissaq nammineq aalajangersinnaanngorpaa
Nunatta nunatsinni piffissaq nammineq aalajangiiffigisinnaanngorpaa. Inuussutissarsiuteqartut neriuutigaat, Europamik niueqateqartarnerup nalunaaquttap akunnerini amerlanerusuni ingerlanneqarsinnaalernissaa.
Nunami aalajangersimasumi nalunaaqutaqatigiinnissamik kina aalajangersaassanersoq pillugu malittarisassaqarpoq.
Nunatsinnilu tamanna maannamut nammineerluni aalajangiiffigineqarsinnaasimanngilaq. Pingasunngornermi nammineq aalajangiissuteqarsinnaanngorpoq.
Múte Bourup Egedep assartuinermullu ministerio Trine Bramsenip (S) ’Piffissamik aalajangiinissamut’ akisussaaffimmik tigusinissaq pillugu isumaqatigiissut pingasunngornermi atsiorpaat.
Tamanna Kalaallit Nunaanni inuussutissarsiuteqartunit nuannaarutigineqarpoq. Neriuutigineqarpormi niuerfinnut Nunatta niueqatigisartagaanut nalunaaquttap-akunneri amerlanerusut atorneqarsinnaalissasut.
- Neriuutigaarput, tamatuma piffissatigut Europamut Danmarkimullu qaninnerulersissagaatigut, Sulisitsisut pisortaanerat Christian Keldsen oqarpoq.
Piffissaq Nuup Københavnillu akornanni nalunaaquttap-akunnerinik sisamanik nikangavoq. Tassa Danmarkimi soraarluni angerlatoqarnerani Nunatsinni ullup-qeqqasiortoqartarpoq.
- Igalaajarannguuvoq, Christian Keldsen oqarpoq.
Aasaanerani nalunaaqutaq oqallisaaqqilersoq
Assartuinermut ministeeriaqarfik piffissamut akisussaasuuvoq, tassunga ilangullugu piffissap qanoq aaqqissuunneqarsinnaaneranut. Pineqartoq pillugu inatsit 193-imeersuuvoq, Kalaallillu Nunaat tassunga ilaatinneqarani.
- Nunatsinni ukiuunerani aasaaneranilu nalunaaqutaq aamma nalunaaqutaqatigiiffiit Inatsisartuni ukiamut oqallisiginissaannut aalajangiiffigineqarnissaannullu qilanaarpugut. Nammineq pisariaqartitavut soqutigisavullu malillugit atugassarititaasut naleqqussarsinnaanngussavagut, Múte Bourup Egede tusagassiorfitsigut nalunaaruteqarnermi oqarpoq.
Tassa inatsiseqarsimanngilaq, Kalaallit Nunaanni piffissamut atatillugu aalajangiisussamik.
- Oqaatigineqarsinnaavoq, Namminersorlutik Oqartussat namminneq piffissaatiminnik aalajangersaasalernissaat piffissanngortoq. Soorunami Kalaallit Nunaata suliassaq tamanna nammineq isumagisinnaasariaqarpaa, Trine Bramsen oqarpoq.
Kalaallit Nunaanni ullumikkut nalunaaqutaqatigiit sisamanut avitaappput. Assartuinermut ministeeriaqarfimmit oqaatigineqarpoq, nalunaaqutaqatigiiaat taakku qanoq pilersinneqarsimanesut paasineqarsinnaasimanngilaq.