Nunatta urania akerleriissutaaqqilissasoq

Nunatta urania pillugu apeqqut akerleriissutaasoq politikkikkut oqallinnermi sammineqaqqittussanngorpoq. Partiip illuatungiliuttup angisuup Inuit Ataqatigiit (IA), qinersinermi ajugaasussatut ilimagineqartup, novembarip 28-ani qinersinermi ajugaassagaluaruni uranimik qalluisoqarsinnaaneranik aalajangiineq ukiumik ataatsimik pisoqaassuseqartoq isumaliutigeqqinniarpaa nunalu tamakkerlugu oqallitsitsisoqareerpat innuttaasunut taasissutigitinniarlugu. Politiken arfininngornermi taama allappoq.

Naliliisartut oqaaseqartartullu arlallit naliliipput, taama pisoqarpat, tamanna nunatut sangujoraartoqarneranik isumaqalersitsisinnaasoq, Kalaallit Nunaata nunarsuaq tamakkerlugu aatsitassarsiornermik suliaqarfimmi tusaamaneqarneranut akornutaasumik. Tamannali IA-p ersissutiginngikkaa, Naaja Nathanielsen, IA sinnerlugu aningaasaqarnermut ataatsimiititaliamut ilaasortaasoq, oqarpoq.

- Qineqqusaarnermi soorunami oqaluuserineqassaaq. Partiitut uranimut naaggaartuuvugut, apeqqullu innuttaasunit soqutigineqarlunilu avissaartuussutigineqarpoq, Naaja Nathanielsen Politikenimut oqarpoq.

Kalaallit Nunaata uranimut akuersaanngilluinnarnermik taaneqartoq, oqallinnerit sakkortuut akerliussutsimillu takutitsinerit angisuut pereersullu Inatsisartuni amerlanerussuteqaqqalaaginnartunit ukiup ataatsip matuma siorna atorunnaarsinneqartoq, atuutilerseqqissagaluarpagu tamatuma sunniuteqalersinnaanera ilumoornerarpaa.

- Kisianni tamanna annilaangassutissaava? Taamaassorinngilara. Aalajangiineq aalassaatigineqaqalunilu nalorninerujussuarmik pilersitsisimavoq, suliallu sivikitsuararsuarmik ingerlanneqarnerata kingorna akuersissutigineqarluni. Pineqartoq tamaat arlaannaannulluunniit attuumassuteqanngitsumik misissuataartittariaqarparput peqqissaartumillu oqallisigalugu, Naaja Nathanielsen Politikenimut oqarpoq.

IA Demokraatinik suleqateqartarpoq - partiillu taakkua marluk Danmarkimi pissutsit aallaavigissagaanni SF aamma Radikalit assigissagaluarpaat. Partiilli siulittaasua Andreas Uldum uran pillugu aalajangiinerup utertinneqarnissaa pillugu mianersoqqussuteqarpoq.

- Demokraatit isumaat tassaavoq, nunatta ullormiit ullormut aqunneqannginnera Kalaallit Nunaata nunarsuarmioqatigiinnut takutittariaqaraa. Aningaasaliisartut nunatsinnut kajungilersinniarlugit patajaassutsimik takutitsisariaqarpugut. Taamaattumik uranimut akuersaanngilluinnarnerup atorunnaarsinnissaanik aalajangiinerup utertinnissaanut peqataarusunngilagut. Siumut isiginissarput pingaaruteqarpoq, Andreas Uldum Politikenimut oqarpoq.

Aviisi Politiken isumaqatigalugu allaaserisaq ikkunneqarpoq