Nunavumut timmisartumik aqquteqalersinnaaneranik siunnersuut Naalakkersuisunit itigartinneqarpoq
Maanna mittarfiit nutaat sananeqarmata, attaveqaatit nutaat suliniutissaannut nutaanut qanoq sunniuteqassanersut utaqqineqartariaqartoq Naalakkersuisut isumaqarput. Taamaasilluni Mimi Karlsenip siunnersuutaa itigartinneqarpoq
Nunavumut timmisartukkut attaveqalernissamik Mimi Karlsenimit (IA) siunnersuutigineqartoq Naalakkersuisunit itigartinneqarpoq.
Tamanna attaveqaqatigiinnermut naalakkersuisup Karl Frederik Danielsenip akissuteqaataani atuarneqarsinnaavoq.
- Maanna mittarfiit nutaat sananeqarmata, attaveqaatit nutaat namminersortut suliniutissaannut nutaanut qanoq sunniuteqassanersut utaqqineqartariaqartoq takuneqartariaqartorlu Naalakkersuisut isumaqarput, siunnersuummut itigartitsinermut naalakkersuisoq ilaatigut tunngaviliilluni allappoq.
Naggueqatitsinnut attaveqarnerulernissaq
Naggueqatitsinnut attaveqarnerusariaqartugut Inuit Ataqatigiinnit Mimi Karlsen ilaatigut siunnersuummini tunngavilersuivoq. Aamma niueqatigiinnikkut kulturikkullu avitseqatigiinneq pitsaanerulersinniarlugit timmisartukkut Nunavumut attaveqalernissaq siunnersuutigaa.
Canadami naalakkersuisut attaveqalernissamut suleqatigineqalersinnaanersut aamma misissorneqarnissaa siunnersuutigalugu.
Karl Frederik Danielsen tassunga ima akissuteqarpoq:
- Inuiaqatigiittut maanna attaveqaatigut atorlugit kimmut sanilitsinnut toqqaannartumik angallaveqarusukkutta, soorunami tamanna akileraartartut aningaasaataannik tassunga tapersiinermut atortariaqassavagut. Taperseeriaatsit qanorluunniit ittut naleqqunnerpaatut naliliiffigineqaraluarpata tamanna kingunerisussaavaa, Karl Frederik Danielsen allappoq.
Mittarfiit naappallaartut
Nangippoq:
- Kalaallit Nunaata tikikkuminartuunissaanut aningaasaliisoqassasoq Naalakkersuisut isumaqarput, Karl Frederik Danielsen oqarpoq.
Tamanna tapeeriaatsit assigiinngitsut, Inatsisartut aalajangiiffigisassaattut siunnersuummi matumani aamma siunnerfigineqartut aqqutigalugit anguneqarsinnaavoq.
- Aallaqqaammut Canadami oqartussaasuniit aningaasaqarnikkut akuunissamut soqutiginnittoqarnersoq, kiisalutamatumunnga Canadami inatsisini inatsisitigut killiliisunik peqarnersoq misissorneqarpat iluaqutaasinnaavoq.
- Aamma attaveqaatinik aaqqissuussinissamut aningaasaliinikkut, soorlu maanna mittarfinnik alliliinitsinni pisutut anguneqarsinnaavoq. Silaannakkut angallasseqatigiiffinnit nalinginnaasumik inerniliisarnerit tunngavigalugit mittarfiit naatsut aalajangersimasumik angallaveqarnissamut akornutaasutut isigineqarnerat matumani tunngavigineqassaaq, oqarpoq.