Nutaamik kattuffiliortoqarnera KNAPK-mi siulittaasumit ugguarineqarpoq
Sinerissap qanittuani raajarniat nutaamik kattuffittaarnerat KNAPK-mi siulittaasup Nikkulaat Jeremiassenimit tupaallaatigineqarpoq. Tamanna KNAPK-p aningaasaqarneranut eqquissasoq oqaatigaa.
KNAPK qimallugu sinerissap qanittuani raajarniat nutaamik kattuffittaarnerat ullumi nalunaarutigineqarpoq.
Kattuffiup pilersinneqarsimanera KNAPK-mi siulittaasumit Nikkulaat Jeremiassenimit tusagassiutitigut sammineqarmat aatsaat paasineqarpoq.
- Pilersitsisoqarsimanera soorunami tupannaqqaarpoq. Taamatulli aalajangertoqarnera ataqqisariaqarparput. KNAPK-p sanngiissutai pillugit oqariartortoqannginnera uggornarpoq, KNAPK-mi siulittaasoq Nikkulaat Jeremiassen Sermitsiaq.AG-mut oqarpoq.
Annaasaqaataassaaq
Sinerissap qanittuani raajarniat KNAPK qimallugu kattuffimmut nutaamut nuunnerat aningaasatigut annaasataaqaassasoq oqaatigaa.
- Sinerissap qanittuani raajarniat KNAPK-miikkunnaarnerat kattuffimmut annaasaqaataassaaq. Taamaattoq soorunami kattuffitsinni ilaasortaasut sullisissavagut, KNAPK-mi siulittaasoq oqarpoq. Ilaasortat sisamat KNAPK-mit Sinerissap Qanittuani Raajarniat Kattuffiannut nuussimasut ilisimatitsissutigaa.
KNAPK-p ilaasortaasa tulaassaasa 1,5 procentii kattuffimmut akiliutigisaraat oqaatigaa. Akiliutit katersorneqartarput qaammatikkuutaartumillu imaluunniit ukiup sisamararterutikkaartumik KNAPK-mut nuunneqartarlutik.
Akisussaaqataaneq oqartussaaqataanerlu
KNAPK angivallaalersimasoq kattuffinngortumi siuttutut inissisimasoq Henrik Sandgreen pilersitsinermi ilaatigut oqaatigaa.
- Siulittaasuusimasup (Henrik Fleischer) taamatut oqarnini nammineq akisussaaffigaa. KNAPK nuna tamakkerlugu ilaasortaqarami sunniuteqartorujussuuvoq. KNAPK-mi suleriaaseq ingerlalluarpoq, tamanna ilaasortanut akisussaassuseqartitsillunilu oqartussaaqataaffigineqarpoq. Suleriaaseq ajunngitsumik ingerlanneqartoq isumaqarpunga, Nikkulaat Jeremiassen oqarpoq.
Atorunnaarsinneqassanngilaq
KNAPK-mi siunnersuisooqatigiit atorunnaarnissaannik Henrik Sandgreenip oqaaseqarnera Nikkulaat Jeremiassenimit paasiuminaatsinneqarpoq.
- Taamaattoqanngilaq. Siunnersuisooqatigiit pilersinneqarsimanerat KNAPK-mut iluaqutaanikuuvoq, taamaattumik atorunnaarsinneqarsinnaanik oqaluttoqarnera eqqunngilaq. Nuna tamakkerlugu ilaasortat Siunnersuisooqatigiit aqqutigalugit peqataatinneqartarput, taamaattumik atorunnaarnissaanik oqalunneq eqqortuunngilaq, Nikkulaat Jeremiassen oqarpoq.