Nutaanik 30-nik tunillatsittoqarsimavoq - Nuummi 30-t
Ullormut tunillatsissimasut amerlassusaasa takuteqqippaat, illoqarfiit pingaarnersaanni tuniluuttoqartoq. Peqqinnissaqarfik assartuisarfiillu aamma eqqugaasimapput.
Tunillatsissimasut ataasinngornermi kingullermik nalunaarsorneqarmatali tunillatsissimasunik nutaanik 13-inik nassaartoqarsimavoq. Tamanna nun.gl-imi atuarneqarsinnaavoq.
Nuummi 30-t tunillatsissimapput, ataaseq Maniitsumi.
Tuniluuttoqarnera atuarfinni atuartullu ilaqutaanni suli atuunneruvoq. Aammali peqqinnisaqarfimmi assartuisartutullu suliffeqarfinni tunillatsittoqarsimavoq, oqartussat marlunngornermi nalunaarutigaat.
Sisimanngornermi piumasaqaataalerpoq, Nuummiit allamut aallarniaraanni tamakkiisumik akiuussutissalerneqarsimanissaq kiisalu tunillatsissimannginnermut uppernarsaamik nalunaaquttap-akunnerinik 48-nik pisoqaassusilimmik takutitsisarnissaq.
Arfininngormat illoqarfiit pingaarnersaanni illup iluani silamilu inuit amerlanerpaamik 20-t katersuussinnaatitaalerput kiisalu kikkut tamarmik iserfigisinnaasaanni qanermut assiaquteqarnissaq piumasaqaataalerluni.
Ulloq 13. november 2021 timmisartunut ukununnga ilaasimasut tunillatsissimasinnaapput:
GL 4502 nal. 9:45 Nuuk-Ilulissat
GL4511 nal. 11:30 Ilulissat-Nuuk
GL415 nal. 14:00 Nuuk-Narsarsuaq
GL416 nal. 16:05 Narsarsuaq-Nuuk