Nuuk: Bussinut utaqqisarfinni oqquisarfiit pitsanngorsarneqassapput
Nuummi bussit utaqqisarfiini illuaqqat oqquiffiusinnaasut ukiuni marlunni misilittarneqareersullu, naliliinerit qiimmaallannarpallaanngillat.
Nuummi bussit unittarfiini illuaqqat utaqqisarfiit taarsersorneqarnissaannut pilersaarutit unitsinneqarput. Kommuneqarfik Sermersuumi sanaartornermut avatangiisinullu ingerlatsivimmit politikerinut innersuussummi tamanna atuarneqarsinnaavoq.
Kommuneqarfik Sermersooq illuaqqanik assigiinngitsunik marlunnik, katillugit arfinilinnik 2020-mi pisiortorpoq. Bussit unittarfiini illuaqqat issittumi pissutsinut tulluarnersut paasiniarlugit misilittarneqartussatut pisiarineqarput. Illuaqqat igalaajusanik qaleqarnerannut pissutaasunut ilaavoq bussini aquttunit utaqqisoqarnersoq takujuminarnerussammat, bussillu utaqqisarfii eqqiaruminarnerussammata.
Piffissalli misiliiffiusup takutippaa bussit unittarfiini utaqqisarfiit nutaat aserorteriffiugaatsiartartut, aserfallatsaaliiniarnerlu akisungaatsiartoq. Eqqiaaneq ajornannginneruleraluarpoq, bussinilli utaqqisunut oqquiffissatut illuaqqat tulluanngillat.
Bussit unittarfiini utaqqisarfiit pillugit suliaq ataatsimiititaliap marlunngornermi ataatsimiinnerani oqaluuserineqassaaq. Ingerlatsiviup siunnersuutigaa bussit unittarfiini utaqqisarfiit nutaannginnerit sivisunerusumik atasussanngorlugit suliarineqassasut. Utaqqisarfiit misiliutitut pisiarineqarsimasut issittumi atugassianngorlugit nutarsarneqassasut aamma siunnersuutigineqarpoq.
- Illuaqqat siornatigut atoreersimasut anginerusunik igalaalerneqarnissaannut aaqqiissummik nassaartoqassaaq, qisunnillu allanik qallersuisoqarsinnaanissaq aamma misissorneqassalluni, nalunaarummi innersuussummut tunngavigineqartumi allassimavoq.
Innersuussut politikerinit akuerineqassappat suliniut nutaaq alla aamma akuerineqartussaassaaq.
Ingerlatsiviup siunnersuutigaa bussit unittarfiini utaqqisarfinni qulliit LED-inik qullitallit, aalasoqarnerani ikittartut, ikkussuunneqassasut, piffissami taarnerpaaffiusumi toqqissisimanarnerusuunissaat anguniarlugu.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...