Nuuk: Imeq imeqarfimmiit qarsutsivoq
Nuuk Imeq matunikuummat aammalu piffissami matumani Nuummi suliffissuaq tunisassiunngimmat Nuummi imermik sinneqartoorujussuartoqarpoq, Nukissiorfimmiillu qarsutsineq unitsinniarlugu ulapputigineqarpoq.
Nunani allani nunarpassuarni imermik nutaamik eqqiluitsumillu amigaateqartoqarpoq. Nunatsinnili imissaaleqisoqartarnera qaqutigoortorujussuuvoq.
Massakkorpiaq imeq literit millionilikkaatut annertutigisoq Nuummi Imeqarfimmiit qaqqatigut ingerlasumik qarsutsivoq.
Nukissiorfiit Nuummi immikkoortortaqarfiani nakkutilliisoq, Christian Broberg qarsutsinermik unitsitsiniaanerminni ulapikkaluaqisoq iluatsipparput susoqarneranik paasiniaaffigalugu.
- Piffissami matumani imermik sinneqartoorujussuaqqavugut, tassunga pingaartumik pissutsit marluk pissutaapput, tassalu Nuuk Imerup matuneqarnerata kingorna tunisassiorunnaarnikuunera imermillu atuijunnaarnikuunera aappaalu tassaalluni Nuummi aalisakkanik suliffissuaq maannakkorpiaq tunisassiunngimmat. Pissutsit taakku marluk pissutaallutik Nuummi imermik sinneqartoorujussuaqqavugut, tamannalu siusinnerusukkut taamak annertutigisumik nalaannikuunngilarput, taamaattorli uloriananngilaq, inunnut illunullu, tassami imeqarfik illunit avinngarusimasumiippoq, Christian Broberg Sermitsiaq.AG-mut oqaluttuarpoq.
Uloriananngilaq - taamaattorli aqqusinernut anngutsinnaveersaagassaavoq
Tassa inuit illullu navianartorsiornissaat aarlerinanngilaq, taamaattorli Nuup ilaani illoqarfiit immikkoortortaani qarsutsinerup unitsinniarneqarnerani malussarsimassasut qularnanngilaq:
- Najugaqarfiit ilaanni, pingaartumik Innannguani najugaqartut malugisinnaasimassavaat imeq nalinginnaasumik kuuttarnermitut inngitsoq. Tassunga pissutaavoq erngup aqqutaasa ilai ruujorersuit ruujorinit nutaaliaasunit aminnerusunillu silinnerujussuugamik, taakkulu erngup oqimaaqatigiissumik kuuleqqinnissaanik suliaqarnitsinni milittariaqartarsimavagut, naatsorsuutigaarpulli Innannguani imermik pilersorneqarnerup aalaakkaajunnaatallattarnera maanna qaangiutereersimassasoq, Nukissiorfiit Nuummi immikkoortortaqarfiani nakkutilliisoq Christian Broberg oqaluttuarpoq nangillunilu:
- Massakkorpiaq tamaviaarluta sulissutigaarput erngup kuuttup aqqusinernut anngutinnginnissaa, tassami aqqusinernut apuutissagaluaruni, issimmat imeq sukkasuumik sikunnguussinnaavoq, taamaalillunilu aqqusinermi angallanneq akornuserneqarsinnaalluni. Taamaammat imermut pumpit malinnaasinnaaleqqinnissaat aammalu imeqarfimmiit qarsutsinerup unitsinnissaa massakkut ulapputigaarput, naatsorsuutigaarpullu qarsutsineq unnuup ilaa unitsissinnaassallutigu, Christian Broberg Nukissiorfinneersoq itisiliivoq.
Kalaallit Nunaanni Politiit ilisimavaat massakkorpiaq imermik imeqarfimmiit annertuumik qaqqatigut kuuttoqartoq pisorlu eqqumaffigineqarpoq, taamaattorli pisoq ajornartoornernik nassataqanngimmat oqartussaasunit ikiorneqarnissamik noqqaasoqarnikuunngitsoq Politiit nakkutilliisuinit (vagtcentral) ilisimatitsissutigineqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...