Nuuk-Kapisillit: ATV-nut aqqusiniliornissaq 306 mio. koruuninik akeqassagatinneqartoq
Illoqarfiit pingaarnersaata Kapisillillu akornanni ATV-nut aqqutiliornissamik misissueqqaarsimaneq kommunalbestyrelsimi suliarineqartussanngorpoq.
Kommuneqarfik Sermersuumi kommunalbestyrelsi marlunngornermi ataatsimiinnerani, nunaqarfimmut Kapisilinnut ATV-nut aqqutissaq 115 kilometerisut isorartutigisoq suliarineqaqqittussanngorpoq.
Sanarfinermut Avatangiisinullu Ingerlatsivik inassuteqaammini allappoq, suliniut pillugu misissueqqaarsimaneq nammassineqarsimasoq, aqquserniornerullu qanoq akeqarsinnaanera naliliiffigineqarsimasoq.
306 millioner koruuninik akeqartussatut nalilerneqarallarsimavoq.
Ingerlatsivik kommunalbestyrelsimut inassuteqaammini allappoq, najukkami siunnersorti peqatigalugu aqqutiliassap isorartussusissaa tamakkerlugu titartarneqarsimasoq. Tamatumani maskiinat assaassutit atortullu allat sumiiffinnut sapinngisamik toqqaannartumik assartorneqarsinnaanissaat ilanngullugu.
- Aqqutit manissortaat sapinngisamik allanngortippallaarnagit malinneqarput, pisariaqanngitsumik immiinissaq qaartiterinissarlu pinngitsoortinniarlugit, ingerlatsivik allappoq.
Aqqutiliorfigineqartussami sumiiffiit tallimat immikkut ajornakusoortitsillutillu akisunerutitsisinnaasutut aamma taaneqarsimapput:
- Ammukariaq
- Kangerluarsunnguami ujaqqerivik
- Qassip tungaanut majuariaq
- Tuapassuit tungaannut majuariaqt
- Kapisillit kitaatungaanni sissaq atuarlugu aqqut sivingasoq
Ingerlatsiviup inassuteqaammini erseqqissaassutigaa, Nuummiit aqqutip akisunerup siulliup tungaanut, Ammukariaq, sulisunuinnaq aningaasartuutissat 6,5 millioner koruunit missaannut nalilerneqarsimasut.
Suliniut ineriartorteqqinneqassappat, kommunalbestyrelsip aalajangersinnaavaa missingersuutissat isumaqatiginninniarfigineqarneranni aningaasanik amerlanerusunik immikkoortitsinissaq.