Nuuk: Meeqqat 40-t kigutimik narlorissarneqarnissaannut neqeroorfigineqassapput

Nuup atuarfiini 5. klassini atuartut tamarmik ukiup atuarfiusup 2021/2022-p ingerlanerani kigutilerisumit immikkut ilisimasalimmit nalilersorneqassapput. Atuartut taakku 20 procentii, tassa atuartut 40-t kigutimik narlorissarneqarnissaannut neqeroorfigineqarnissartik naatsorsuutigissavaat.

Peqqissutsimut Naalakkersuisoq Kirsten Fencker, Anna Wangenheimip §37 naapertorlugu kigutigissaanermut atatillugu apeqqutaanut akissuteqarluni taamatut ilisimatitsissuteqarpoq.

- Kigutit atortarnerini kigutinik narlorsaanissamut pisariaqartitsisoqavikkaangat innersuussisoqartarpoq. Tassa imaappoq isikkorinnissaq pillugu kigutit narlorsarneqarneq ajorput. Kigutinik narlorsaanissamik aallartitsinissamut Nunatsinni kigutigissaasoqarfimmi kigutit alleqqullu narlorsarnerini kigutilerisoq immikkut ilisimasalik aalajangiisarpoq, Kirsten Fencker akissuteqaammini ilisimatitsivoq.

- Narlorsaanissamut neqerooruteqartarneq aallarteqqinniarlugu december 2020-mi aalajangiineq tunngavigalugu kigutinik narlorsaasarnermut innersuussisarnermi tunngavittut ileqqussanngortinneqartut suliarineqarnikuupput.

Narlorsaanerup aallartisarneqannginnerani angajoqqaat meerarlu peqatigalugit narlorsaanissamut kissaatit, suleqatigiinnissaq qanermillu eqqiluitsuutitsineq pillugit nalilersuisoqartarpoq.

Meeqqat 25-t kigutaat narlorsarneqartut

Pisortat kigutinik narlorsaatitsisarnerat 2019-imi nuna tamakkerlugu unitsinneqarpoq, Naalakkersuisulli neqeroorut Nuummi atuutseqqilernikuuaat, meeqqalli Nuup avataani najugaqartut namminneq akilikkaminnik Nuummi kigutileriffimmut namminersortumut kigutileritikkiartorsinnaapput.

Maannakkuugallartoq meeqqat 25-t missaat kigutaat narlorsarneqarput. Meeqqat taakku ilaat 01.01.2021 sioqqullugu aallartipput ilaallu 2021-mi aallartillutik.

1,1 millioner koruunit atorneqarsimasut

Inatsisartni ilaasortap Anna Wangenheimip (D) kigutilertinnermut aningaasanik qanoq atuisoqarsimatiginersoq nassuiaqqusimavaa.

Kirsten Fenckerip 2021-mi kigutit alleqqullu narlorsarnerinut aningaasat atorneqarsimasut akissuteqaammini nassuiarsimavai. 1,1 millioner koruunit sinnilaarlugit atorneqarsimapput.

Aningaasat ukununnga atorneqarsimapput:

• Akissarsiat: 411.000 koruunit
• Avataanit ikiuineq: 434.000 koruunit
• Nioqqutissanik pisineq: 134.000 koruunit
• Angalanerit: 148.000 koruunit
• Katillugit: 1.127.000 koruunit

- Kigutit alleqqullu narlorsarnerinut kigutilerisoq immikkut ilisimasalik atorfinitsinneqaqqammertoq kontomit tassannga akissarsiaqartinneqarmat, kontomi aningaasartuutit qaffannissaat naatsorsuutigineqarpoq. Meeqqat amerlanerusut kigutaasa narlorsartinneqarnissaannut innersuunneqartarnissaat ilutigalugu kigutit narlorsarneqartarnerinut aningaasartuutit tamatuma saniatigut qaffakkiartussapput, Kirsten Fencker allappoq.

Kigutilerisutut immikkut ilisimasalik oktobarip aallaqqaataani atorfinitsinneqarpoq.

Innersuussinermi innersuussinissamut tunngaviusut tulliuttut aallaavigineqassapput:

1. Kiguserfiup qulliup kiguserfimmut allermut annertuumik qalliisarnera, taamaalillunilu kiguserfimmi qullermi kigutit saarliit tunuini imaluunniit kiguserfimmi allermi kigutit saarliit saavani ikkiup ikeqalerneranik pilersitsisartut. 75 %-it sinnerlugit kigutit saarliit ilummut sammisut tamatumalu kingunerisaanik malunnartumik nalinginnaanngitsumik nungullariartortitsisut.
2. Kiguserfiit qulliit annertuumik, 6 mm-inik annertunerusumik salliuallaartut + qarlumut qullermut attuussaattartunik qullernik kigutilerfillitloqqamikkut naqisimaneqartut.
3. Kiinermi erlippaakkut taamaallaat kiisartunik kigutillit.
4. Imminnut kallussaattunik kigutillit, kigutinik equjartortitsisunik kigutillit 2,1 +1 ,2.
5. Sanimutlilummulluunniit ersarissumik equsumik kiisartut.
6. Kigutit kukkusumik inissisimasutlinissinnerloqqasut (matumani kigutaarsinnissaq tulluartumik aaqqiissutaasinnaanani).
7. Kigutit suli puttussuutinngitsut (kigutit saarliit tulorissallu).
8. Kigutit annertuumik kukkusumik inissisimasut (ersarissumik inissakilliortut, tassa minnerpaamik kigutip ataatsip silissusaanik annertutigisumik inissakilliortut, assersuutigalugu kigutit kigutip inissisimanerluttup akornanniittut qanittuaraanerat) amerlanertigut kigutaarsinnermik katsorsarneqartartut.
9. Kigutinik narlorsaaneq/pilaasarneq ataatsimut neqeroorutigineqanngillat.
10. Kigutinik narlorsaanermut atatillugu kigutaasanik neqerooruteqartoqanngilaq.