Nuuk umiaatitaarpoq
Umiaq Sjællandip kitaani sanaqqaagasoq Nuummi sapaatip akunnerini kingullerni marlunni qajartortartut peqatigiiffiannit Saqqit Vestsjællandersumit sananeqarluni naammassineqarpoq.
Umiaq Nuup Kommuneanut tallimanngormat aggustip 10-ani tunissutigineqartoq, Nuup Kommuniata tusagassiivia ilisimatitsivoq.
Tunisisunit umialiornermi aqutsisoq Svend Ulstrup peqataavoq, umialiortitsinissamillu isumassarsisoq Poul Hansen, værksted Åmosen, Dianalund aamma peqataalluni.
Tunissuttoq, Nuup Kommunea sinnerlugu ”Tupaarnaq”-mit Steen Pedersen Kirsten Heilmannilu peqataapput.
-Umiaq tunissutigineqartoq kangerlummi Amerallap nunataasa ilaanni Kilaasarfimmi aasami tupersimaartilluta atorluartassaqaarput, meeqqat angerlarsimaffianni Tupaarnami pisortaq Steen Pedersen oqarpoq.
- Umialiortut torrallassimaqaat, nuannaarutigeqaarpullu. Kangerlummi kapisilinniartilluta aavartillutaluunniit atortarumaarparput, Steen Pedersen oqarpoq.
Steen Pedersenip erseqqissarpaa meeqqat umiamik atuilerunik qanga inusaaseq, umiamik pinngitsoorneqarsinnaanngitsumik angallateqarluni nunatsinni qanoq qanga inuuniartoqarsimasoq.
Tunissutigineqartoq meterit 9-it missaanni takitigisoq sinnginneqaruni 8-10-nik issimasoqassaaq.
Qajartortartut peqatigiiffiat Saqqit, tassaavoq kalaallit ineriartornermikkut akornutillit Danmarkimi najugallit peqatigiiffiat.