Nuummi bussinut ilaasartut amerlanerulerput: Tamanna sinneqartoornermik kinguneqarpoq
Nuup Bussii kommunimit pigineqartut 2021-mi amigartooruteqareersimallutik 2022-mi sinneqartooruteqarput, ukiup aallartinnerani corona ajornartorsiortitsisimagaluartoq.
Angusat naammagisimaarnartut.
Nuup Bussiini ukiumoortumik nalunaarusiami 2022-mut tunngasuni inerniliineq taama nipeqarpoq.
Tassani atuarneqarsinnaavoq, ingerlatseqatigiiffik kommunimit pigineqartoq 2021-mi 347.000 koruuninik amigartooruteqareerluni 673.000 koruuninik sinneqartooruteqarsimasoq. Angusat Nuup Bussiini missingersuusiarineqarsimasunut, 778.000 koruuninut, naapertuutikannerput.
Tamannalu 2022-mi qaammatini siullerni marlunni corona pissutigalugu kaaviiaartitat appariarujussuarsimanerat tunngavigalugu angusaavoq naammagisimaarnarluinnartoq.
Bussinut ilaasartut amerlanerulersimasut
Nammineq aningaasaatit 19,4 millioner koruuniupput, 2021-mullu sanilliullugu siorna ilanngaatissat ilanngaatigereerlugu kaaviiaartitt 26.361.098 koruuninit 28.109.361 koruuninut qaffariaateqarnerat misigineqarsimavoq.
Kaaviiaartitat ima agguataarsimapput: 75 procentit bussinik ingerlassisarnermit, 7 procentit ingerlatsinermut tapiissutinit, 14 procentit atuartunik ingerlassisarnermit 3 procentillu attartukkanik ingerlassisarnermit, 1 procentilu "isertitanit allanit" pisuulluni.
2022 bussit aalajangersimasumik ingerlaarnerannit kaaviiaartitat 2021-mut sanilliullugit 1.388.000 koruuninik amerlanerusimapput - aamma 2022-mut missingersuutinut sanilliullugit, taakkua ilimagisanit 656.000 koruuninik amerlanerusimammata.
2022-imi bussinut ilaasut tamarmiusut 1.734.374-inik amerlassuseqarsimapput, taakkualu 2021-mut sanilliullugit amerleriaateqalaarsimallutik, 2021-mi ilaasut 1.685.424-nik amerlassuseqarsimammata.
Ilaasut amerleriaateqarnerat pisimavoq 2022-mi januaarimit februaarimut coronamik nappaalasoqaraluartoq, tamannalu ukiumoortumik nalunaarusiaq naapertorlugu naammagisimaarnartorujussuartut nalilerneqartariaqarpoq, tamanna inuit amerlanerit bussinut ilaasaleqqissimanerannik takutitsisimmat.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...