Nuummi illunik uiguleriiaannik sanaartortoqalersoq
Inissiat uiguleriiaat qaliallit Nuup immikkoortuani Nuussuarmi, Mannguani sanaartorneqarnissaannut pilersaaruteqartoqarpoq.
Nuummi inissiat qaliallit aqqanillit uiguleriittunngorlugit sanaartorneqartussanngorput. Inissialiortitsinissamut tunngatillugu tusarniaaneq naammasseqqammerpoq.
Rambøll A/S Clement og Carlsen Arkitekter suleqatigalugit suliniuteqartuupput, nunaminertarlu 1.217,7 kvadratmiiteri inissialiorluni sanaartorfiussaaq.
Assigiinngisitaartuussasut
Ingerlatseqatigiit erseqqissarpaat Nuummi ukiuni 15-ini kingullerni sanaartorneq ataasiinnarmik annerusumik periuseqarfiusimasoq: inissiaqarfiit arlalinnik quleriillit.
- Inissiat sanaartorneqartut assigiinngisitaartuunerunissaannut, najugaqarfiillu piujuartitsinermik tunngaveqartitsinissaannut, innuttaasut allaanerusunik inissianik qinersinnaanissaannut inissianik qalialinnik uiguleriiaannik sanaartortitsinissamut siunnersuuteqarsimavugut, suliniullu tusarniutigineqarsimalerpoq.
- Inissiaqarfissaq ataqatigiinnernut qanilaarnerusunut periarfissiisinnaavoq, inissiallu pinngortitamut qanillutik silamiinnerusinnaanermut periarfissiillutik - illup ilua silataalu ilaqutariinnut tulluarluinnarput. Inissiat piginneqatiginninnermik aallaaveqartinneranni aamma sanaartukkanut najugaqartullu akunnerminni akisussaaqataanerusinnaanerannut periarfissiissaaq, suliniummut qinnuteqaammi allassimavoq.
Inissiat sisamanik initallit
Inissiat pillugit nassuiarneqarpoq inissiat tamarmik qaliaqassasut, sisamanillu initaqassasut. Inissiat tamarmik ineeqqat tallimmernissaannut periarfissaqassapput.
Inissiat qutsissumi inissisimassapput, sisorartarfiit isikkivigissallugit.
- Sumiiffik maanna sanaartorfiunngilaq, qooqqullu tungaanut isikkivigilluinnarluni, Nuummi pinngortitap ilamininnguani pisuttuarfissaqarluni sisorartarfigilluarlunilu. Sanaartornermi ujakkaartarfiusut nunamilu pisuttuarfiit innarneqassanngillat, erseqqissarneqarpoq.
Inissiat ilaqutariinnut tulluartunngorlugit titartarneqarsimapput, aammali aappariit angerlarsimaffimminni suliffeqarsinnaanissaannut periarfissiillutik. Sanaartukkat inissianik piginneqatigiinnissamut imaluunniit namminersortutut inissiaateqarnissamut siunnerfeqartut, ilisimatitsissutigineqarpoq.
Tusarniaanermi akissutit pingasut tiguneqarsimapput. Akissutit Kommuneqarfik Sermersuumi ingerlatsivimmit suliarineqarput, kingornalu politikkikkut aamma naliliiffigineqassallutik.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...