Nuummi killilersuutinik nutaanik atuutsitsisoqalissanngilaq, misissuisarnerilli pitsaanerulersinneqassapput
Illoqarfiit pingaarnersaanni tuniluuttoqaraluartoq tunillatsissimasullu amerlagaluartut killilersuutinik amerlanerusunik maannakkorpiaq atuutsitsilertoqassanngilaq. Peqqissutsimut Naalakkersuisoqarfik Sermitsiaq.AG-mut taamatut ilisimatitsivoq.
![Nuummi killilersuutinik nutaanik atuutsitsisoqalissanngilaq, misissuisarnerilli pitsaanerulersinneqassapput](https://image.sermitsiaq.ag/159462.webp?imageId=159462&width=960&height=512&format=jpg)
Nuummi ullut arlerlugit tuniluuttoqangaatsiareersoq tunillatseqqasullu maanna 133-nik amerlassuseqalersimagaluartut, katerittunut akuliutinnginnissaq allanullu qanillinaveersaarnissaq oqartussanit suli maleqquneqarput. Tassa killilersuutinik sukateriniartoqarpasinngilaq.
- Nuummi akiuussutissalersuineq ingerlalluarmat, peqqinnissatigut illersorneqarsinnaatillugu killilersuutit sapinngisamik annikinnerpaamiitinneqarnissaat ukkatarineqarpoq. Partiinilu siulittaasut tamarmik tamanna isumaqatigiissutigaat, Peqqissutsimut Naalakkersuisoq Kiista Fencker Sermitsiaq.AG-mut oqarpoq.
Naalakkersuisut Siulittaasuata Naalakkersuisoqarfiani pisortaq Hans-Peder Barlach Christensen coronamut atatillugu suliaqartunut aamma siulittaasuusoq erseqqissaavoq, ammaaqqinnissamut periusissiaq Naalakkersuisunit saqqummiunneqarsimasoq malillugu inuiaqatigiinni tuniluuttoqarunnaavittoqarnissaanik imatut anguniagaqartoqanngitsoq, coronalli akornatsinniilersimanera ilinniartariaqaripput.
- Siunertarineqarpoq amerlanerpaanik akiuussutissalersuinerup saniatigut tuniluuttoqarnerata sapinngisamik aqunneqarnissaa.
Amerlanerit misissortissinnaalissasut
Islandimut Danmarkimullu sanilliullugit illoqarfiit pingaarnersaannit tuniluuttoqarnerugaluartoq killilersuutinik nutaanik atuutsitsisoqalissanngilaq.
- Naalakkersuisut inissisimaffimmik nalilersuijuarput, tamannalu oqartussat suleqatigalugit pisarpoq. Naalakkersuisunut pingaaruteqarpoq, aalajangiinernut partiini siulittaasut peqataatinneqartarnissaat, Kiista Fencker oqarpoq.
Ilaatigut Falckip, Danmarkimi misissuisoqartarneranik ingerlatsisuusup suleqatigineqarsinnaanera sukkasuumillu tunillatsissimanermik paasissutissiisinnaasumik (quicktest) misissuisoqartalersinnaanersoq eqqarsaatigineqarput.
Nuummi tuniluuttoqarnera pissutigalugu piffissami kingullermi misissortittariaqartorpassuusimapput. inuillu silami nilleqisumi isigaarsillutik nalunaaquttap akunnerpassuini tulleriaallutik utaqqisariaqartarneq pillugu isornartorsiuisoqangaatsiarsimalluni.
Misissuisarfik illoqarfiup qeqqaniit allamut nuunneqassasoq
Inunnullu nalunaaquttap akunnerpassuini misissortikkiartorlutik utaqqisariaqartartut Nuummi illoqarfiup qeqqani ullut tamaasa takuneqartartunut nutaarsiassatsialaqarpoq.
Naalakkersuisoqarfiup Sermitsiaq.AG-mut ilisimatitsissutigaa, Nuummi misissuisarfiup Inussivimmut nuunneqarnissaa sulissutigineqartoq, Inussivimmi inuit ullumimut sanilliullugu amerlanerusut misissorneqarsinnaammata.
- Imaanngitsoq maannakkut suliarineqartartut naammaginnginnatsigit, pisariaqartitsinerli annertusiartormat, Kiista Fencker oqarpoq.
Nuussineq qaqugorpiaq pissanersoq naalakkersuisoqarfimmit oqaatigineqarsinnaanngilaq.
- Sulisut ilanngunneqartussaapput, immikkut sulisussanik pissarsiniartoqartussaavoq, atortut nuunneqartussaapput il.il...
Naalakkersuisoqarfik nuussinissamut ulluliisoqarniariarpat nalunaaruteqassaaq.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...