Nuummi oqaluffiit CO2-mik ukiumut 127 tonsinik sipaaruteqarniarput
Hans Egedep Oqaluffiani, Annaassisitta Oqaluffiani Biskoppillu allaffiani 2024-mi kissarsuutit uuliamik ikummatissallit kissarsuutinik innaallagiatortunik taarserneqassapput. Tamanna CO2-mik annertuumik sipaarutaassaaq.
Nukissiorfiit, Eqqissisimatitanut Ataatsimiititaliaq aamma Nuummi biskoppip allaffiata suleqatigiilluarnerat isumaqatigiissummik kinguneqarpoq, tamannalu Nuummi oqaluffiit CO2-mik aniatitsinnginnerunissaannut iluaqutaassaaq.
2024-p ingerlanerani Hans Egedep Oqaluffiani, Annaassisitta Oqaluffiani Biskoppillu allaffiani kissarsuutit uuliamik ikummatissallit kissarsuutinik innaallagiatortunik taarserneqassapput, taakkulu Utoqqarmiut Kangerluarsunnguanni erngup nukinganik nukissiorfiup nukinga sinneruttoq atortarniarpaat.
Nukissiorfiit tusagassiorfinnut nalunaarummi taama allapput.
Naatsorsuutigineqarpoq aasaq nallertinnagu innaallagiatortunik kissarsuutilersuisoqarumaartoq, uuliamillu kissarsuuteqarnermut sanilliullugu tamanna CO2-mik ukiumut 127 tonsit sinnerlugit sipaaruteqartitsissasoq.
2000 tonsit sinnerlugit annikillisinneqassapput
Suliniut oqaluffinni marlunni CO2-mik aniatitsinermik 99,7 procentinik sipaarfiussaaq, tamannalu biskoppip nuannaarutigaa:
- Nukissiorfiillu suleqatigiinnitta aallartinnera qujamasuutigeqaara, tassami avatangiisinut mingutsitsinngitsumik ukioq 2024-miit oqaluffiit kiassarsinnaalissagatsigit.
Nuannaarutigaarput pinngortitamik paarseqataagatta, siunissamilu oqaluffiit marluusut
avatangiisinik mingutsitsinngitsumik kiassarneqalernerat ilagiinnut pinngortitamullu
pitsaasuummat, Biskop Paneeraq Siegstad Munk oqarpoq.
Nukissiorfiit naapertorlugit oqaluffiit kissarsuutaannik uuliamik kissarsuutitalinnik nutarterineq Nukissiorfiit Nuummi innaallagissamik kiassarnermut suliniutaasa 18-it ilaannaraat.
- Suliat taakkua ataatsimut katillugit CO2-mik aniatitsinermik 2043,3
tonsimik sipaarutaassapput, Nukissiorfiit allapput.
Ingerlatseqatigiiffiiup Nuummi Hotel SØMA-mi Sømandshjemmimilu assingusumik suliniuteqarsimanini oqaluttuaraa, tassani ukiumut 141 tonsit sipaarneqartartut naatsorsorneqarsimavoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...