Nuummi politiit inuit aninissaannut mianersoqqusipput
Nuummi politiit ataasinngormat unnukkut inuit mianersoqquvaat illoqarfimmut angalaarnaveersaaqqullugit anorersuarnera pissutigalugu, anorersuarujussuartut sakkortutigisumik anoraasuartarmat. Tamanna peqatigalugu Nuuk qamittoorpoq.
Politiit inassutigaat aatsaat pisariaqavitsillugu inuit anisassasut.
- Containeri 40 fodsinik angissusilik umiarsualivimmi uppissimavoq. Illoqarfimmilu containerit amerlanerusut uppinnissaat ulorianartoqarpoq. Taamaattumik politiit qatserisartullu illoqarfimmi assersuisimapput. Tamatuma saniatigut arlalinnik ulorianartorsiortoqartarsimavoq, pisuinnaat aqqusinermut biilit ingerlaarfiannut tingitaasarlutik aporneqarnissaminnik ulorianartorsiorlutik, Nuummi politiini politiassistent Frederik Heilmann paasissutissiivoq.
Containerinik ajornartorsiuteqarnerup saniatigut politiit nalunaarfigineqarsimapput sanaartornermi ikorfat illuararlu uppissimasut, aammalu erfalasulerfiit arlallit uppissimasut. Anorilu ima sakkortutigaaq illoqarfiup atuarfiisaa ilaanni Samuel Kleinschmidtip Atuarfiani pappialarsuit tingitaangajassimallutik.
Nalunaaqutaq 17.00 Asiap uuttorsimavaa Nuummi anoraasuat sekundimut 27,6 meterinik sakkortussuseqartut.
Nalunaaqutaq 18.00 missaani siullermik sarfaaruttoortoqarpoq, sarfaneqqillunilu kvarterit tallimat missaat qaangiuttut. Kingornali arlaleriarluni sarfaaruttoortoqartarpoq.