Nuummi takkutiinnarluni kapitikkiartortoqarsinnaalerpoq
Nuummi innuttaasut 3.500-t coronavirusimut akiuussutissamik suli siullermeerlutik kapitinngillat. Innuttaasut siullermeertumik aappassaaneertumillu kapitinnissaannut periarfissiillutik immikkut ittumik takkutiinnarluni kapitikkiartortoqarsinnaalerpoq.
Nuna tamakkerlugu innuttaasut 10.000-t suli coronavirusimut akiuussutissalertissimanngillat. Taakkunannga innuttaasut 3.500-t Nuummi najugaqarput.
Covid-19-imik tunillatsissimasut arlallit nunatsinni paasineqareernerisa kingorna Nuummi sisamanngornerit tulliuttut pingasut takkutiinnarluni akiuussutissalertikkiartornissamik periarfissiisoqarpoq.
Nunatta nakorsaanera Henrik L. Hansen tusagassiorfinnut taama nalunaaruteqarpoq.
- Nuummi innuttaasut 3.500-t suli siullermeerlutik akiuussutissalertinneqanngillat. Ulluni kingullerni pissutsit takutippaat tunillaassuunnerup Nunatsinnut pitinnginnissaa suli ajornakusoorluinnartoq. Ukiakkut tunillaassuuttoqarujussuassanngippat innuttaasut amerlanerpaartaat akiuussutissalersimasariaqarput, nakorsaaneq Henrik L. Hansen oqarpoq.
Takkutiinnarluni akiuussutissalertittoqarsinnaajumaarpoq Ukaliusap atuarfiata timersortarfiani nalunaaqutaq 14.00-17.00 sisamanngornerit tulliuttut pingasut.
Ullut pineqartut:
- 15. juli
- 22. juli
- 29. juli
Tunillaassuunneq sukkasuumik ingerlavoq
Tunillatsissimasut siulliit arfininngormalli paasineqarneranit maannamut 13-it paasineqareerput. Ilulissani, Sisimiuni, Nuummi, Qaqortumi, Narsami Narsarsuarmilu tunillatsissimasoqarpoq. Oqartussat naatsorsuutigaat ulluni tulliuttuni tunillatsissimasunik nutaanik paasisaqartoqaqqissasoq.
Marlunngornermi ualikkut nalunaaqutaq 16.00 aallarnerfigalugu killilersuutinik nuna tamakkerlugu atuutsitsisoqalerpoq.
- Akiuussutissalertissimasut amerlanerpaartaat tunillatsinngitsuuittarput, tunillatsittutualli sakkukitsuinnarmik malussartarlutik, taamatullu tunillaannginnerusarlutik. Taamaammat akiuussutissalertinnissaq iluaqutissarpassuaqarpoq. Ilinnut, ilaqutarnut inuiaqatigiinnullu tamanut, Henrik L. Hansen oqarpoq.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...