Nuummit inuulluaqqussutit iliveqarfimmiilerput
Nutaarmiuni innuttaasut sisamanngormat naasuusat, kransit, bamsit inuulluaqqussutillu qaammatip siuliani alianartumik pisoqarneranut atatillugu Nuummi innuttaanit apuunneqarusuttut tiguaat
Nutaarmiuni angutip 22-nik ukiullip aanamik 75-nik ukiulimmik, panianik 31-nik ukiulimmik ernutaanillu arfineq-pingasunik ukiulimmik toqutsinerata, allanillu sisamanik toqutseriaraluarnerata kingorna qaammat qaangiuttorlu, Nuummi innuttaasut Nutaarmiunut inuulluaqqussutaat nunaqarfimmut apupput
- Naasut, ungaluliat, naneruutit bamsillu ilerrit qaaviniilereerput aamma allakkat atuarneqarput. Ilaqutaasut tapersersorneqarnertik tuppalliutigaat, Bikki Reimer, Inissiaatileqatigiiffimmi A/S INI'mi tusagassiinermik sulialik oqaluttuarpoq.
Katersineq februaarip arfineq-aappat Nuummi ingerlanneqarpoq tunniussallu karsinut sisamanut immiunneqarput.
ISS poortukkat akeqanngitsumik suliarineqarnissaat neqeroorutigaat, INI'p Nuummit angallanneqarnissaat isumagalugu.