Nuup eqqaani kinguneqanngitsumik ujaasisoqarsimagaluartoq
Kalaallit Nunaanni Politiit pingasunngornermi unnukkut ajunaalernermi kalerrisaarummik tigusaqarsimapput, ujaasisoqaraluarmalli ajornartorsiortunik nassaartoqarsimanngilaq.
Politiit pingasunngornermi ualikkut arfernup missaani ajunaalernermi kalerrisaarummik tigusaqarsimapput. Kalerrisaarut Nuup Akiata kangiata tungaaneerpasissimavoq.
Pigaartut pisortaat Malik Olesen taamatut ilisimatitsivoq.
Politiit angallatertik sumiiffimmukartissimavaat, kalerrisaarutilli suminngaanneerfiani tinissimammat nunamut qanillisinnaasimanngillat.
Malik Olesenip ilisimatitsissutigaa, illersornissaqarfiup qulimiguuliutaa unnukkut anorikillimmat ujaasitikkiartorneqarsimasoq.
Kalerrisaarummik piginnittoq kinaanersoq paasiniarniaraat
- Qulimiguulik unnuap ingerlanerani ujaasigaluarpoq, iluatsitsinanili, pigaartut pisortaat oqaluttuarpoq.
Politiit sisamanngornermi ullaakkut inunnik maqaasisaqartoqarneranik nalunaarfigineqarsimanngillat, politiillit ullup-qeqqata siornatigut kalerrisaarummik piginnittoq kinaanersoq paasiniarniarpaat.
Pigaartut pisortaata tamatuma saniatigut innuttaasunut kaammattuutigaa, arlaannik maqaasisaqarunik imaluunniit assersuutigalugu arlaat isumaqatigiissut malillugu takkussimanngippat nalunaaruteqaqqullugit.