Nuup illoqarfiata ilaani datacenterimut illuliaq nutaaq sananeqassaaq
Datacenterimut illuliamik 1200 kvadratmeterisut angitigisumik Tusass suliarinnittussarsiuussivoq.
Tusass Nuummi Qinngorpumi nutaamik datacenterimut illuliorniarpoq.
Namminersorlutik Oqartussat suliffeqarfiutaata neqeroorummut atatillugu paasissutissaataani tamanna takuneqarsinnaavoq.
Allaaserisaq naapertorlugu datacenteri 1200 kvadratmeterisut angitigissaaq:
- Illuliassaq saviminernik sinaakkusersorneqassaaq, oqorsaasersukkanik qallerneqassalluni betonngimillu toqqavilersorneqassalluni natilersorneqassallunilu, Tusass allappoq.
Neqerooruteqarnissamut killissarititaasoq 2024-mi maajip naaneranut inissinneqarnissaa naatsorsuutigineqarsinnaavoq, sanaartornerlu 2024-mi juunimiit 2025-p qeqqata tungaanut ingerlanneqarnissaa naatsorsuutigineqarluni.
Datacenteri nutaaq pillugu Tusass oqaaseqartinniarlugu Sermitsiaq.AG-p sulissutigaa.
Atortulersuutinut pingaarutilinnut sanaajunngitsut
Tusassip 2022-mut ukiumoortumik nalunaarusiaani sanaartornerup tunuliaqutaa pillugu atuartoqarsinnaavoq.
Suliffeqarfiup maannakkut datacenterii ukiup ingerlanerani attaveeruttarlutillu teknikkikkut ajornartorsiuteqartarsimasut, ajornartorsiullu qanoq aaqqinneqarsinnaanersoq misissorneqassasoq, tassani Tusass allappoq:
- Datacenterit maanna atuuttut atortulersuutinut pingaarutilinnut sanaajunngillat, taamaattumillu ullumikkut piumasaqaatinut naleqqunnatik. Taamaattumik qanoq pitsaanerpaamik datacenterinik nutarterisinnaanerluta misissorparput.
- Datacenteri nutaaq akisoorujussuussaaq, taamaattumillu pilersaarusiorluarneqartariaqarlunilu pingaarnersiuisoqaqqaartariaqarpoq, suliassat aningaasaliissutillu allarpassuit eqqarsaatigalugit, Tusass ukiumoortumik nalunaarusiamini allappoq.