Nuup mittarfiani arnat qaartartumeerinissamik siorasaarisutut tigusarineqarlutillu unnerluunneqarput
Tallimanngornermi ullup qeqqata missaani arnat marluk tigusarineqarput unnerluutigineqarlutillu Nuup mittarfiani qaartartumeerinissamik siorasaarisimasutut. Kalaallit Nunanni politiit ilisimatitsipput quujasaarutiginninniarlutik asuli taakku pisimasut.
Illarniutigiinnarlugu mittarfimmiitilluni qaartartoqarneraasarneq pissusissamisuunngilaq. Tamanna arnat marluk misigivaat, tallimanngornermi tigusarineqaramik.
Politiit tusagassiuutitigut nalunaaruteqarlutik ilisimatitsipput tallimanngornerup ullap tungaani nalunaaqutaq 10:33 politiinut nalunaarutiginnittoqarsimasoq Nuup mittarfiani qaartartumeerinissamik siorasaarisoqarmat. Politiit mittarfimmukarput, apuuteriitsiarlutilli paasivaat qaartartoqanngitsoq.
Kalalallit Nunaanni politiit nakkutilliisuutitaasa pisortaat Mark Larsen nassuiaavoq:
- Arnat marluk taakku timmisartukkut nassiussassanik tunniussiartorneranni, arnap aappaa oqarpoq poortukkami qaartartoqartoq, taamaaliorpoq qungujulaatigaluni. Naak massa asuli illarniutigiinnarlugu pisimagaluarlut, mittarfimmiitilluni minnerpaamilluunniit illarniutissaanngilaq. Taamatut pisoqaraangat tamatigut pimoorussamik suliarineqartarpoq, nakkutilliisuutitat pisortaat nassuiaavoq.
Ungalulersuisoqarpoq
Politiit nalunaarumminni ilanngullugu erseqqissaatigaat arnap aappaata poortukkami qaartartoqarneraanera politiit kalerrisaarutinik nipiliortitsillutik mittarfimmukarnerannik kinguneqarsimasoq.
- Ungalulersuisoqarpoq killisiuinerillu aallartinneqarlutik, sukkasuumillu politiit paasivaat arnat taakku illarniutigiinnarlugu sallusimasut. Arnat taakku marluk tigusarineqarput unnerluutigineqarlutillu qaartartumeerinissamik siorasaarisimasutut, Kalaallit Nunaanni Politiit allapput.
Politiit ilanngullugu ilisimatitsipput arnat taakku maanna iperagaareersut, taamaattorli naatsorsuutigisinnaavaat eqqartuussivitsigut malitseqarsinnaasoq.
Air Greenland ilisimatitsivoq pisoq silaannakkut angallassinermut allannguisoqartariaqarneranik kinguneqarsimanngitsoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...