Nuup Saava pillugu isumassarsianik unammisitsineq
Kommuneqarfik Sermersooq Nuup Saava oqaluttuarisaanermut ilaasoq pillugu isumassarsianik unammisitsinissamut 1 millionit koruuninik immikkoortitsiniarpoq.
Kommuneqarfik Sermersuumi kommunalbestyrelsi Nuup Saavata – aamma Nuutoqqatut ilisimaneqartup – ineriartorteqqinneqarnissaanut tunngatillugu innuttaasunik peqataatitsinermik ingerlatsineq aalajangiiffigaat.
Sumiiffik oqaluttuarisaanermut pingaaruteqarluinnarpoq, ukiullu ingerlaneranni Nuup Saavani suliniutit arlallit innuttaasut akerliunerisa kingorna itigartinneqartarput.
Kommuni maanna innuttaasunik peqataatitsinermik ingerlatsisimalerpoq, inerniliivorlu:
- Akuutitsiniaaneq ataatsimut isigalugu inernerata takutippaa, immikkoortup sukisaarsarfittut annersaartorfissatullu Nuummi innuttaasunit annerusumik kissaatigineqartoq, tamanna eqqumiitsuliornikkut kulturikkulu pisunik periarfissaqartillugu. Aammattaaq silami nunaminertat sanaartukkanut tulluussarlugit immikkoortumilu sammineqartussanut naleqqussarnerullugit iluarsaanneqarnissaat kissaatigineqarpoq, Sanarfinermut Avatangiisinullu Ingerlatsivik, peqataatitsineq januaarimi 2023-mit juulimut 2023-mi pisoq pillugu allappoq.
Kikkut tamarmik siunnersuuteqarsinnaapput
Ingerlatsiviup tamanna tunuliaqutigalugu, sumiiffiup qanoq ineriartortinneqarnissaanut isumassarsianik unammisitsinissaq alloriarnerup tullerisariaqaraa inassuteqarpoq.
Unammisitsineq ukiup ingerlanerani pisinnaavoq, taannalu 1 millionit koruunit missannik akeqassaaq.
Kikkut tamarmik immikkoortup qanoq aaqqiivigineqarnissaa pillugu siunnersuuteqarsinnaassapput, innuttaasunillu peqataatitsineq aamma tassanngaanniit inernerit unammisitsinermut tunngaviussapput.
- Unammisitsinissamut tunngasunik suliaqarnissaq qaammatini arfinilinni pissasoq naatsorsuutigineqarpoq naliliisussanillu arlaannaannulluunniit attuumassuteqanngitsunik pilersitsinissaq ilanngullugu; aamma qaammatit arfinillit atorlugit unammisitsinermut siunnersuutinik nalilersuisarnissamut naggataatigullu isumassarsiat pillugit unammisitsinermi ajugaasoq toqqarneqassaaq, ingerlatsivik inassuteqaammini, kommunalbestyrelsip akuerisaani taama allappoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...