Drama
Nuussuarmi aallaasersortoq
Angut 21-nik ukiulik tigusarineqarpoq. Ajoqusertoqanngilaq
Nuummi Politiit arfininngormat ullaakkut angut inuusuttoq 21-nik ukiulik tigusaraat, Nuup ilaani Nuussuarmi Pisiffimmut qanittumi inissiat ilaanni igalaamit aallaammik eqqarsimasutut unnerluutigalugu.
Tamanna Nuummi Politiini pigaartup uppernarsarpaa.
Taassuma ilanngullugu paasissutissiissutigaa ajoqusertoqarsimanngitsoq, aqqusinermilu angallattunut alapernaatsunullu assersuut, peerneqarsimasoq.
- Erseqqinnerusumik oqaatigisinnaanngilarput qanoq sunalu pissutigalugu pisoqarsimanersoq, isiginnittut tigusarineqartorlu killisiulissavagut, Nuuk Politiini pigaartoq oqarpoq.
Arfininngormat ullaakkut nalunaaqutaq 5.25 arnat marluk nalunaarutiginnipput angut Nuussuarmi inissiami igalaamit sisamariarluni eqqarsimasoq. Politiit sakkullit pitarneqarsinnaanngitsumillu vestillit nalunaarutiginninnerup kinguninngua Nuussuarmi Pisiffiup eqqaani inissiaqarfimmut ornigupput.
Nalunaaqutaq arfineq-marluk qaangilaaraa ambulance takkuppoq aqquserngillu assersukkat ilaanni piareersimalluni. Politiit aqqusinernik assersuipput biilertut alapernaatsullu inissiaqarfimmut aallaasersorfiusumut qanillivallaaqqunagit.
Arfineq-pingasut missaanni politiit gassi qulliliornartoq atorlugu inissiamut iserput.