Ø: Misissuinerit naammanngillat

Frank Aaen, Enhedslisten, CIA'p isertortumik timmisartuussisarsimanerinik oqaatigisat misissorneqartarnissaanik tusarlerneqarami assigiinngitsunik misigissuseqarpoq.

- Sammisaq ukiorpassuarni suliaraarput aamma nuannaarutigaarput uniinnanngimmat. Naalakkersuisut misissuisoqaqqinnginnissaanik oqarnerannit, soorunami una siuariarneruvoq, Frank Aaen oqarpoq.

- Allattugaatit kisimik takuneqarsinnaassapput allat paasisaqarfigerusutagut aatsaat paasisaqarfigisinnaavagut inunnik ilisimannittunik killisiuinikkut.

Taamaattumik Enhedslistenip misilissavaa CIA'p timmisartuussisarsimaneri ataatsimiititaliarsuarmit pilersinneqartussamit misissorneqarnissaat. Tassani Ilisimannittut oqaaseqartitassat uppernarsaasussaatitaasutut akisussaatillugit aggersarneqarsinnaapput.

Taamaasiortariaqarpugut naalakkersuisut tunuartut timmisartuussisarsimasinnaanerit ilisimaneraat paasiniarlugu, pasitsaassaavoq USA sorsunnermi tigusat Kalaallit Nunaat aqqusaarlugu parnaarussivinnut isertuussanut ingerlatsisarsimasoq.

- Annilaanngatigaara tamakku pillugu iternga tikillugu paasisaqartoqannginnissaa.

- Taamaattumik Irakimi sorsunneq, Afghanistanimi sorsunneq aamma Danmarkip nunat tamalaat akornanni inuit pisinnaatitaaffiisa nalunaarutaannik eqquutsitsinera, uani tigusat pillugit suliami paaserusuppagut, Frank Aaen oqarpoq.

Taassuma neriuutigaa, ataatsimiititaliarsuup taamaattup saniatigut nassuiaatigissagaa, sooq danskit Stats- og Udenrigsministeriami qaffasissumik atorfilittaat amerikamiunut saaffiginnissuteqarnersut, qulakkeerniarlugu timmisartuussinerit pillugit misissuinermi USA piumasaqarfigineqarnavianngitsoq.

Naalakkersuisut siusinnerusukkut tigusanik timmisartuussinerit ataatsimiititavissuarmit misissorneqarnissaat itigartitsissutigereerpaat.