Ocean Explorer kaanngartinneqarpoq
Umiarsuaq takornariartaat ikkarleqqasoq Tarajumit kaanngartinneqarpoq.
Umiarsuaatileqatigiiffik Sunstone Ships, Ocean Explorerimik piginnittoq, paasissutissiivoq umiarsuaq kaanngartinneqartoq.
- Ocean Explorer sisamanngornermi ullaakkut Tunumi ikkarleqqanerminit iluatsittumik nusunneqarnermigut kaanngartinneqarpoq. Tamanna pisinnaasimavoq umiarsuarmit Tarajumit nusunneqarneratigut umiarsuullu nammineq nukiisa atorneqarnerisigut.
- Umiarsuarmi issimasunik ajoqusertoqarsimanngilaq, avatangiisinik mingutsitsisoqarsimanani umiarsuullu timitaa ajoqusersimanani, Sunstone Ships allappoq.
Ocean Explorer inunnik 206-inik issimasoqarpoq, umiarsuarlu ataasinngormalli ikkarleqqasimavoq.
Pinngortitaleriffik qutsavigigaat
Tarajoq tassaavoq Pinngortitaleriffiup umiarsuaa aalisakkanik misissuut ilisimatusaallu:
- Pinngortitaleriffimmi aqutsisut umiarsuaataannilu Tarajumi inuttat tamaasa qutsavigerusuppavut Ocean Explorerip ikiorniarnissaa pillugu SunStonemut isumaqatigiissuteqarnissamut ammasimanerat piumassuseqarsimanerallu pillugu. Isumaqatigiissut sukumiilluinnartumik suliarineqarpoq, aamma Tarajoq umiarsuup ikkarlinneraniit ullut marluk ingerlaneranni sumiiffimmut tikiussimavoq, Sunstone allappoq nangillunilu:
- Umiarsuit takornariartaatit allat ungasinngitsumiittut, Quark Expeditionimit, Silver Seamit aamma Hurtigrutenimit pisut, aamma qutsavigerusuppavut, taakkuami tamarmik ikiuunnissartik neqeroorutigisimavaat, tamannali pisariaqalersimanani.
Umiarsuup naqqa misissorneqassasoq
Sunstone allappoq, Ocean Explorer ilaasuilu maanna umiarsualiviliassasut, tassanilu umiarsuup naqqa ajoqusersimaneranik misissorneqassasoq. Ilaasut umiarsualivimmut angerlamut timmisartuunneqarfigisinnaasaminnut ingerlanneqassapput.
Australiamiut angalatitseqatigiiffiat Aurora Expeditions umiarsuup takornariartaatit angalaneranik isumaginnittuuvoq, Sunstonelu umiarsuarmik piginnittuulluni.
Kalaallit Nunaanni Politiit pingasunngornermi ualikkut paasissutissiipput, Imarsiornermik Aqutsisoqarfimmit nalunaarutiginninneq tunngavigalugit ikkarlittoqarsimanera misissuiffigigitsik, pisumut atatillugu inatsisinik unioqqutitsisoqarsimanersoq takuniarlugu.