OECD NORA-rmiunik paasiniaassaaq
Qaammatip tulliuttup ingerlanerani OECD Kalaallit Nunaannut, Savalimminut Islandimullu katillugit pingasoriarluni angalassaaq.
Tamanna pissaaq OECD-p misissuinissaani, tamannalu atlantikup avannaani suleqatigiiffiup NORA-p imminut misissorneqarnissaminik suliniutigaa.
Kalaallit Nunaat siulliulluni angalaffigineqassaaq novembarimi sapaatip akunnerani siullermi, Islandimullu Savalimmiunullu angalanerit ingerlanneqassallutik novembarimi sapaatit akunnerisa pingajuanni. Angalaneq taamaattoq aamma Norgep sineriaani ingerlanneqassaaq, tamassumali qaqugu pinissaa suli aalajangerneqanngilaq, NORA allakkatigut nutaarsiassatigut allappoq.
Angalernerni tamani pingasuni immikkut ilisimasallit peqataasassapput, ataatsimiititseqattaarnikkullu nunani ataasiakkaani politikerit, ilisimatuut, atorfillit allallu qitiusumik aalajangiisartut isumassarsiortitsisartullu apeqqarissaarfigisassallugit.
Paasiniaalluni angalanerit saniatigut paasissutissanik katersuisoqassaaq immikkullu ilisimasallit sammisasassanut immikkut toqqarneqarsimasunut nalunaarusiussapput, taamaasilluni OECD-mit immikkut ilisimasallit apeqqarissaarfigisassaminnik oqaloqateqarnissaminnut piareersimalluaqqullugit.
OECD-p misissuinerata inernera 2010-p affaani kingullermi saqqummissangatinneqarpoq.
"NORA-p siunertaraa OECD-p misissuinera nunat NORA-mut ilaasortaasut nunarsuup immikkoortuatut isiginnitsitseqataanissaa, iluminnilu suleqatigiinnerup suli annertusineroqqinnissaanut tunngaviliilluni, NORA-p pisortaa Lars Thostrup oqarpoq.
OECE-p nalunaarusiaa Review of the NORA Region pilersaarutit malillugit 2010-p naanerlerani saqqummeruni tassaassaaq itisiliisumik nalunaarusiarsuaq siulleq, Kalaallit Nunaannik, Savalimiunik, Islandimik Norgellu sineriaanik politikkikkut-aningaasarsiornikkut nunarsuup immikkoortuatut misissuinermik.
Tamanna peqatigalugu kissaatigineqarpoq misissuibneq nunarsuup immikkoortuata tamassuma immikkut periarfissaanik piginnaasaanillu avammut saqqummersitseqataassasoq, Nunat Avannarliit ilanngullugit.
Nalunaarusiaq politikkikkut suliniutissanik inassuteqaateqassaaq, nunarsuup immikkoortuata ineriartorneranut nukittorsaataasinnaasunik.