OECD Nunatsinnut paasisassarsiortoq
Parisimi OECD-mit immikkut ilisimasallit tallimat Nuummeeqqammerput nunatsinni qitiusumik isumassarsisitsisartut aalajangiisartullu apersoriartorlugit.
OECD-mit immikkut ilisimasallit tallimat tassaapput aallartitat ittuat Joaquim Oliveira, aalisarnermik immikkut ilisimasalik Carl-Christian Schmidt, avatangiisinik immikkut ilisimasalik Gerard Bonnis, nutaaliornermi immikkut ilisimasalik Claire Nauwelaers politikerilerinermillu ilisimasalik Carlos Icaza. NORA-mit peqataapput siulittaasoq Jørn Hansen pisortarlu Lars Thostrup.
Inuussutissarsiornermut Naalakkersuisoqarfik aamma Kalaallit Nunaanni Takornariaqarnermut Inuussutissarsiornermullu Siunnersuisoqatigiit (GTE) apersuinissarpassuarnik, immikkut ilisimasallit sapaatip akunnerani uani Nuummi ingerlatassaannik, pilersaarusiorsimapput, taamatut GTE quppernermini nittartakkamini allappoq.
Nunat Avannarliit Atlnatikumi Suleqatigiiffiat (NORA) 2008-imi aalajangerpoq NORA-mi suleqatigiinni OECD-mik misissuisitsiniarluni.
NORA-p siunertaraa OECD-p misissuineratigut Kalaallit Nunaat, Island, Savalimmiut Norgellu sineriaa nunarsuup immikkoortuatut nalunaarsuusiussagaa, akunnerminnilu suleqatigiinnerisa nukittorsaqqinnissaanut tunngaviliilluni.
Pilersaarutit malillugit misissuineq 2010-p aallartinnerani naammassippat tassaassaaq itinerusumik naliliineq siulleq, imaqartussaq NORA-mi suleqatigiit politikkikkut-aningaasarsiornikkut nunarsuup immikkoortuani ataatsimut misissuinermik.
- Neriuppugut OECD-p misissuineratigut suleqatigiiffiup tamassuma immikkut ittumik periarfissaanik piginnaassusaanillu avatangiisitsinnut takutitsissasoq tamannalu peqatigalugu atlantikup avannaamiut suleqatigiinneranni pitsaanerusumik tunngaviliilluni, NORA-p pisortaa Lars Thostrup oqarpoq.
Nalunaarusiaq inerniliisoq imaqassaaq politikkikkut piviusumik suliniutissatut siunnersuutinik, suleqatigiiffiup ineriartorneranik nukittorsaasinnaasunik. Taamaasilluni nalunaarusiaq aamma siunissami politikkikkut aalajangiisarnissamut atortuussaaq pingaarutilik, nunat ataasiakkaat iluini suleqatigiiffimmilu tamarmi.