Oline Danmarkimi palasitut soraartoq

Danmarkimi palasi kalaaleq Oline Berthelsen palasitut soraarniarluni Kalaallillu Nunaannut uterniarluni aalajangersimavoq.

- Ukiut tallimat nuannersimaqaat, aammali assoroornartarsimapput, palasi oqaluttuarpoq.

- Sumulluunniit pigaluaraangama Danmarkimi kalaallimik palaseqartoqarnera nuannaarutigineqarlunilu qujamasuutigineqartarpoq. Misigisarpassuaqarsimavunga nuannersunik, iluaqutaasimasutut misigitinneqartarlunga.

- Isertuutissanngilarali Danmarki tamaat suliffigalugu aamma assoroornarsinnaasimammat. Ukiumut 30.000 kilometerit missaannik biilertarsimavunga, Oline Berthelsen nammineerluni biilersinnaanermut allagartaqanngitsoq, uiminilli Poul Kurdahlimit biiliunneqartarsimasoq oqaluttuarpoq. Aalborgimi najugaqarfimminit biiliutsittarsimavoq.

Nunami tamarmi naalagiartitsisarneq

- Pingaartumik påske juullilu assoroornartarsimapput, nalliuttunimi ullut tamaasa naalagiartoqartarpoq. Peqatigiiffik Inuit suleqatigalugu nuna tamakkerlugu naalagiartitsisarnissaq aaqqissuuttarparput.

Oline Berthelsen februaarip qaammataata naanerani soraarninngussaaq, tamannali pitinnagu naalagiartitsiniarluni nuna tamakkerlugu angalaqqittariaqarpoq.

- Juullimi oqaluussissutissakka maannakkorpiaq piareersarlugit suliaringakkit piffissaqanngikkaluarpunga oqaloqatiginissannut, Oline illarluluni oqarpoq.

Martsip qaammataata aallartinnerani Kalaallit Nunaannut utissaaq, uinilu Nuummi uiguleriiaammik illusisimapput. Aappariilli Danmarkimut atassuteqaannassapput, tassami Løkkenimi jyllandip avannaaniiittumi aasaanerani illugisartagartik aasarsiorfigisarniarlugu pilersaarutigaat.

Oline Berthelsen ukiuni 14-ini Sisimiuni palasioreerluni 2014-imi Danmarkimi palasinngorpoq. Taamanikkut soraarninngoreersimagaluarpoq, Danmarkimili unammilligassaq misilikkusussimallugu. Maannali pimoorullugu soraarninngorniarpoq.

Oline Berthelsenip ilisimatitsissutigisinnaanngilaa qaqugu paarlatsissaanik pissarsisoqassanersoq.