Ombudsmandi kommuni pillugu: Sulianik suliarinninneq akuerineqarsinnaanngilliunnarpoq
Ombudsmandip Avannaata Kommuniata qatanngutigiinnik sisamanik angerlarsimaffiup avataanut pinngitsaaliissummmik inissiisimanera pillugu suliai isornartorsiorpai.
Kommunip sulianik suliarinnissimanera akuersaarneqarsinnaanngilluinnarpoq, kommunimi sulianik angajoqaatut aappariit meeraasa sisamat inissinneqarnerinut angerlartinneqarnerinullu tunngasunik suliarinninnermini amerlasoorpassuarnik ilungersunartunillu kukkussuteqarsimavoq.
Inatsisartut Ombudsmandia Avannaata Kommuniani suliarineqarsimasunik misissuisimasoq taamatut oqarpoq.
Suliaq 2018-imi oktobarip qaammataani aallartissimavoq, tassani kommunip angajoqqaatut aappariit meeraasa sisamaasut ilaat ataaseq kinguaassiuutitigut killisanik qaangiiffigineqarsimaneranik pasitsaassineq pissutigalugu angerlarsimaffiup avataanut inississimavai.
Politiit qaammatit marluk qaangiummata suliamik misissuinertik unitsissimavaat.
Kommunip inissiisimaneq attatiinnarsimagaa
Politiit suliamik misissuinertik unitsikkamikku kommuni nalunaarfigisimavaat, kommunilli meeqqanit sisamaasunit pingasut angerlarsimaffiup avataanut inissiisimanini ingerlatiinnarsimavaa.
Taamaaliorsimavoq angajoqqaatut aappariit imigassamik atuivallaarnerat tunngavilersuutigalugu.
Angajoqqaatut aappariit sulianik meeqqamik inissinneqarnerinut angerlartinneqarnerinullu tunngasunik suliarinninneq Ombudsmandimut 2020-mi februarimi aamma 2020-mi oktobarimi naammagittaalliuutigaat. Aappariit meeraannit sisamaasunit pingasut suli angerlarsimaffiup avataanut inissinneqarsimasuupput.
Ombudsmandip erseqqissaassutigaa, meeqqanik angerlarsimaffiup avataanut inissiisimaneq eqqortuunersoq isummerfigisimanagu. Akerlianik kommunip annertoorujussuarmik akuliusimaneranut atatillugu inatsit malinneqarsimanersoq misissorsimavaa.
Tunngavilersuutigineqarsimasut piffissarlu suliamik suliarinninnermut atorneqarsimasoq isornartorsiorneqartut
Inatsisartullu Ombudsmandiata oqaatigaa, suliamik suliarinnissimaneq amigaateqartoq. Taanna ilaatigut allappoq:
- D-p kinguaassiuutitigut killissanik qaangiivigineqarsimasinnaaneranik pasitsaassineq pillugu suliap misissorneqarnera unitsinniarlugu politiit aalajangernerannik kommunip 13. december 2018- imi ilisimasaqalernerata kingornatigut A-p B-llu meerai angerlarsimaffimmik avataani inissisimaneqaannassanersut imaluunniit angerlartinneqarsinnaanersut kommunip isummerfigisimasariaqaraluarpaa.
Ombudsmandip tamatuma saniatigut kommunip aalajangiinermini tunngavilersuutigismasai isornartorsiorpai, oqaatigalugu 'amigarluinnartumik tunngavilersuisoqarsimasoq' kiisalu kommunip suliarinninnermini piffissaq atorsimasaa sivisuallaartoq.
Kommunip ataasiarluni suliami pisoq ataaseq suliaringamiuk qaammatit arfinillit atorsimavai, Ombudsmandi naapertorlugu sapaatip-akunnialuisa ingerlaneranni - ajornerpaamillu pisoqassappat qaammatialuit ingerlaneranni suliarineqarsimasinnaagaluartoq. Matumani pineqarpoq, aappariit meeraasa angerlarsimaffiup avataanut inissinneqarneranni suliap kommunimi suliareqqitassanngortillugu utertinneqarnissaanik Isumaginninnermi Naammagittaalliuuteqartarfiup aalajangiisimanera.
Nuussisimaneq isornartorsiorneqartoq
Meeqqat angerlarsimaffiup avataanut inissinneqarnerannut atatillugu illoqarfimmut allamut Kommuneqarfik Sermersuumiittumut nuutsitsisoqarsimavoq.
Tamatuma malitsigisaanik angajoqqaat meeqqatik najorusullugit illoqarfimmut inissiiffiusumut nuussimaput. Tassunga atatillugu Avannaata Kommunia aamma isornartorsiorneqarpoq:
- Kommuni angajoqqaat aappariit meeraasa angerlartinneqarnissaannik suliat suliarineqarneranni suliani allagaatit kommunimut nuuffigineqartumut tamatuma peqatigisaanik nassiunnagit angajoqqaat aappariit illoqarfimmut allamut nuussimanerat tunngavilersuutigalugu unitsitsigami ilungersunartunik kukkussuteqarsimavoq, Ombudsmandi Vera Leth allappoq.
Kommunip Ombudsmandimut ilisimatitsissutigisimavaa angajoqqaat suleqatigiuminaassimasut, angajoqqaajusullu illoqarfimmi nuuffigisimasaminni sumi najugaqarnerlutik nalunaaruteqarsimanngitsut, kommunillu taamaammat angajoqqaat Kommuneqarfik Sermersuumi aalajangersimasumik angerlarsimaffeqalernissaat piumasarisimallugu, meeqqat angerlartinneqarnissaannik suliaq najugariligaanni suliarineqarniassammat.