Ombudsmandi: Putsumik najuussuisarneq sulisunik qimarratsitsivoq
Sulilerlaat ilaat sivikitsumik sulereerlutik soraartariaqartarput, utoqqaat illuanni Puilasunnguani najugaqartut iniminni pujortartarnerat pissutigalugu. Iliuuserineqartut naammaginanngillat, ombudsmandi oqarpoq.
Paamiuni utoqqaat illuanni Puilasunnguini sulisussanik nutaanik atorfinitsitsinissaq unammillernarsinnaavoq, tassami sulisut nutaat atorfinikkaluaannartut tupap tikka iluaalliutigalugu sivikitsumik atorfeqariarlutik soraarniarlutik aalajangertarmata.
Tamanna ombudsmandip Puilasunnguani misissuisimaneranit nalunaarusiami atuarneqarsinnaavoq.
Sulisulli kisimik putsumik najuussuineq ajorput.
- Najugaqartut arlallit ineeqqaminni pujortartarput, matutillu ammatikkajuttarlugit taamaalilluni tupasunnitsorujussuusarluni. Ilaqutaasullu ilaat pulaartut ingerlaannangajak ingerlaqqittarput putsumik iluaalliuuteqarlutik, nalunaarusiami allassimavoq.
Utoqqaat illuanni pisortaqatigiinnit ombudsmandimut ilisimatitsissutigineqarpoq ineeqqat silaannarissarfeqartut, aamma silaannarissarneqartartut.
Putsumik najuussuinnginnissaq illersoruminaattoq
- Misissuiartortut namminneerlutik qimerluugaat aamma pisortaqatigiit oqaatigisaat naapertorlugit naliliivunga, tupap pujuanik najuussuinermik pinaveersaartitsineq naammattumik sunniuteqanngitsoq. Pujortartarneq sapinngisamik allanut ajoqutaassanngilaq, ombudsmandi oqarpoq.
Kommuni ilisimatitsivoq putsumik najuussuinnginnissaq illersorniarlugu ininik silaannarissaanermut ilassutaasussat silaannarmut saligutit ineeqqani ilaneqassasut.
Utoqqaat illuanni Puilasunnguini 22-t missaanniittut sulisorineqarput, taakkualu affaata missaanniittut aalajaatsuupput.
Sulisut aalajaatsut amigaataasut
- Napparsimasoqartarnera, akuerisamik sulinnginnerit aamma akuerisaanngitsumik sulinnginnerit pissutigalugit akulikitsumik paarlattaasartut paarlakaatsinneqartarneri pisariaqartarpoq. Paarlatsinik akulikitsumik atuisarnerup kukkuluttornissaq aamma paaqqinninnerup pitsaassusianut kalluaanissaa aarlerinartuuvoq, nalunaarusiami allassimavoq.
- Sulisussaaleqisarneq, tassunga ilanngullugu ilinniarsimasunik sulisussanik aamma sulinngitsoortarnerit pillugit ajornartorsiutit, tamatumalu nassataanik kingunerit pisortaqatigiinnit paasissutissiissutigineqartut isumakulunnartutut isumaqarfigaakka, ombudsmandi Gedion Jerimiassen oqarpoq.
Ombudsmandip innersuussutigaa pisortaqatigiinnit suliniutit ingerlasut ingerlatiinnarneqarnissaat, tassunga ilaatillugit sulisut oqaloqatigineqartarneri, aamma atuipiluttuunermut katsorsagaasinnaanermik neqeroorut pillugu.