Ombudsmandip inissiisarfinni pimmatiginnittoqartarneranik ajornartorsiuteqartoqarnera uparuaarpaa

Nunami pinerluuteqarsimasunut inissiisarfinnut inissinneqarsimasut ajunngitsumik pineqartarpat? Apeqqut tamanna, Folketingip Ombudmandiata ulluni 16-ini nunami nakkutilliilluni angalaarnermini akissutissarsiniarsimavaa.

Pinerluuteqarsimasunut inissiisarfiit arfinillit tikeraarneqarsimapput, taakkulu ataatsimut isigalugit ajunngitsumik ingerlanneqartutut isikkoqarput:

- Ataatsimut isigalugit Kalaallit Nunaanni Politiit pinerluuteqarsimasunullu isumaginnittoqarfiup inuit nakkutigisatik ajunngitsumik ataqqillugillu pisaraat, Ombudsmandi ukiumoortumik nalunaarusiamini allappoq.

Folketingip Ombudsmandiata Nakkutilliinera

Ombudsmandip suliassaasa aamma ilagaat Kalaallit Nunaanni Savalimmiunilu danskit oqartussaaffiisa suliffeqarfiutaannik nakkutilliinissaq, taakkununnga ilanngullugit pinerluuteqarsimasunut isumaginnittoqarfik politiillu.

Kalaallit Nunaanni nakkutilliinerup ingerlasimanera:

• Ombudsmandeqarfimmi sulisut sisamat - marlunngorlugit avinneqarsimasut - Kalaallit Nunaanni 2021-mi oktobarip qaammataani nakkutilliinerit 20-t ingerlappaat.
• Ombudsmandeqarfimmi sulisut pinerluuteqarsimasunut inissiisarfiit arfinillit, politeeqarfinni isertitsiviit arfinillit kommunefogedillu marluk nakkutilliillutik suliaqarfigisimavaat.
• Tunumut takuniaanerit pingasut video aqqutigalugu ingerlanneqarsimapput, Kitaanilu kommunefogedinut nakkutilliineq oqarasuaatikkut ingerlanneqarsimalluni. Sinneruttut 15-it tikillugit nakkutilliiffigineqarsimapput.
• Pissarsiffik: Ombudsmanden.dk

Ombudsmandili aamma pitsanngorsaataasinnaasunik arlalinnik inassuteqaateqarpoq, nakkutilliillunilu pulaarnerni maluginiarneqarsimasut marlussuit uparuarneqarlutik.

Ilaatigut inassutigineqarpoq, inissinneqarsimasut akornanni pimmatiginnittoqartarneratigut uumisaarisoqartarneratigullu mattusimasarnerup pinaveersaartinneqarnissaata nakkutigineqarnerunissaa:

Uumisaarineq pimmatiginninnerlu

- Nakkutilliisut ilaatigut pinerluuteqarsimasunut inissiisarfinni ataasiakkaani inissinneqarsimasut akornnani uumisaarisoqarlunilu pimmatiginnittoqartarnera maluginiarsimavaat - inissinneqarsimasut nukittunerit kattullutik inissinneqarsimasunut sanngiinnernut uumisaarillutillu pimmatiginnittarlutik, ombudsmansi allappoq, nangillunilu:

- Kikkut nukittunerunerannut ilaatigut apeqqutaasinnaavoq, inissinneqarsimasup sumik pinerluuteqarsimanera imaluunniit suminngaanneersuunera. Inissinneqarsimasut ilaat kinguaassiuutitigut pinerluuteqarsimanertik pissutigalugu uumisaarneqartartput, allallu Tunuminngaanneersuunertik pillugu uumisaarneqartarlutik.

Ombudsmandimit oqaatigineqarpoq, uumisaarisoqartarnerata malitsigisaanik inissinneqarsimasoq allangut akuliukkunnaarluni imminut mattusimatittartoq, sumiiffiilli ilaanni mattusimasoqarsinnaanngilaq, inissinneqarsimasut allat ineeraannut matuersaateqaramik isersinnaammata.

Kalerrisaarut aserorsimasoq

Ombudsmandip nakkutilliisimanermini uparuangaasa ilagaat, nunami inunnut tigummigallagassanngortinneqarsimasunut isertitsiviit.

Politeeqarfimmi Nuummiittoq kisimi ulloq unnuarlu sulisoqartarpoq. Sumiiffinni allani sulisut ualikkut sisamanut soraarlutik angerlartarput:

- Politeeqarfimmi politiinik sulisoqanngippat, kiffaanngissusiiarlugit pineqaatissinneqarsimasut isumannaassusaat ilaatigut kalerrisaarutit videokkullu nakkutilliissutit atorlugit qulakkeerneqartussaavoq. Ombudmandeqarfimmi sulisut paasisimavaat, atortut taakku sumiiffinni tamaniunngitsoq ajoquteqartut.

- Assersuutigalugu sumiiffimmi ataatsimi kalerrisaaruteqarpoq, ikippallanneqartoq tusaaneqarsinnaavoq, qanorli oqartoqarnersoq tusaaneqarsinnaanani. Ombudsmandimit inassutigineqarpoq, ajoqutit iluarsineqassasut, nalunaarusiami allassimavoq.