Oqaatsit: Josephina 19-inik ukiulik akimasumik nersornaaserneqartoq

20.000 koruuninik nersornaaserneqartinnani ukiup ataatsip missaani suliniut pillugu nassuiaat ilisimatusarnikkullu ilusilersuineq suliarineqarsimavoq.

- Suup samminissaanik isumassarsinissaq ajornakusoornerpaanikuuvoq, Josephina oqaluttuarpoq, taannalu ilinniarnertuunngorniarfimmi inuiaqatigiilerinermi ilinniartitsisuminit peqataanissamut kajumissaarneqarsimavoq.

- Ukiup ataatsip matuma siorna aallartippoq, klassitsinnilu sisamaalluta peqataanissarput pissanganartutut isigaarput. Aap, ingerlanera sivisooq tamaat tapersersoqatigiittarpugut, Josephina oqaluttuarpoq, taannalu suliniummut Kalaallit Nunaanni oqallisigineqartumut pingaarutilimmut tulluartumik qulequttamik oqaasertaliorsimavoq:

Oqaatsit pingaaruteqarnerat

"Kalaallit Nunaanni kinaassutsimut kinaassutsimullu attuumassuteqarnermut oqaatsit pingaaruteqarnerat"

Ukiup ataatsip missaani ilisimatusarnermik suliniummi sulisimaneq pillugu naasunik, allagartamik nersornaatisiamik 20.000 koruuninillu akissarsitinneqarpoq.

Misissuinerminik allaaserisamini suliniutip nassuiaataa Josephinap ima aallarnerpaa:

”Nuummi inunngorpunga peroriartorlungalu, inuunerma annersaa tassani najugaqarnikuullunga, kalaallisuulli oqalussinnaanngilanga kisimiinngilangalu. Kalaallit nunaqavissullu qassit kalaallisut oqalussinnaanngitsut pillugit kisitsisinik eqqorluartunik pissarsiniarneq ajornakusoortarpoq, taamaattoq tamanna Kalaallit Nunaanni ilisimaneqarluarpoq, akuttunngitsumillu sakkortuumik oqallisigineqartarpoq taaguuteqartumik ”Oqaatsit pillugit oqallinneq”. Qanormi ililluni nunami inunngorfigisami peroriartorfigisamilu ilitsoqqussaralugu oqaatsit atorlugit oqaluttoqarsinnaassanngila, tamannalu inuup kinaassusianut Kalaallit Nunaannullu attuumassuteqarneranut qanoq sunniuteqartarpa?”

Inuusuttut kinaassusaat

Taanna nangilluni allappoq, Nuummi inuusuttut kalaallisut oqalussinnaannginnerat sunniutaasa misissornissaat siunertaasoq, pingaartumik kinaassuseq aamma attuumassuteqarneq eqqarsaatigalugu.

”Taamaattumik ilitsoqqussaralugu oqaatsinik oqalussinnaannginnerup qanoq misigisimanarnera misissorpara, pingaartumik oqaatsit inuiaassutsimik aamma atassuteqarnermik pingaarutilimmik kinaassutsimik takussutissaammata. Oqaatsimmi kinaassutsitsinnut, suminngaanneernitsinnut eqimattanulluunniit sorlernut atassuteqarnermut nassuiaataapput, ilitsoqqussaraluguli oqaatsit annaaneqaraangata tamakku qanoq sunnerneqartarpat?”

Inuusuttut kalaallisut kinaassutsimik takussutissatut oqaatsit qanoq atortarneraat minnerunngitsumik aamma suliniummi sammineqarpoq, nalunaarusiarlu 14-inik quppernilik kapitalinik ukuninnga imalik naammassineqarpoq: killiliineq, periaaseq, misissuineq, inerniliineq kiisalu atuakkat atorsimasat allattorsimaffiat aammalu ilanngussat.

Josephinap nalunaarusiaa misissoruk

Københavns Universitetimi Forskerspiremik suliniut pillugu atuarit

Josephina Østeril Nitter Sørensen Københavns Universitetimi nersornaasiinerani uani takuneqarsinnaavoq, Carl Ravnbak / Københavns Universitet

Immikkoortumi humaniorami innersuunneqartut allat akornanni Josephinap suliniutaa ajugaasuuvoq.

Misigissuseq piviusorsiunngitsoq

- Piffissarujussuaq atorlugu suliarereerlugu piviusorsiorpallaanngitsumik misigisimavunga. Kisiannili tulluusimaarutigaara paasigaangakku ilisimatusartut allat suliara atuarsimagaat, pingaartingaarlugulu ajugaasussatut toqqarsimallugu, Josephina oqarpoq, erseqqissarlugulu ilisimatusarnermi periutsit pillugit ilikkagaqarluarluni.

Suliap ingerlanerani ilisimatuumik suliamut siunnersuisussamik ujartuivoq, Camilla Kleemann-Andersenillu ikiuinera qujamasuutigaa.

Ullumikkut Odensemi Katedralskolemi 3.G-mi inuiaqatigiilerineq tuluttullu qaffasinnerpaamik ilinniarpai. Broby Efterskolemi efterskolereernermi kingorna Nuummi GUX-imi 1.G-mi atuarpoq, kingornalu Canadap illoqarfiisa minnerit ilaanni, Torontomit akunnerit marluk affarlu biilerfiusumi, paarlaasseqateqarluni. Kingorna Odensemut nuuppoq, efterskolemi ikinngutigilersimasani qanillillugit.

Siunissamut pilersaarutit

- Nuummulli angerlarnissara qilanaareqaara, Sermitsiaq.AG-mut oqarpoq.

Josephina ilaatigut sunngiffimmini arpattarpoq.

Siunissami pilersaarutai suli aalajangerneqanngillat, aappaaguli ilinniarnertuunngorniarfimmi atuarnini festerninilu naammassippata qaammatini sisamani sakkutuunngorniarusuppoq.

- Taava Nuummut uteqqikkusuppunga, tassanilu ukiumi ataatsimi immersorlunga ilinniarfigiumasara aalajangerniarpara, Josephina oqaluttuarpoq.

Sunngiffimmi sammisat

Ilisimatusartunngorusuttutut suliniuteqarnermi sammisamik toqqaanissaq oqaasertaliinissarlu pingaarnerutinneqartarput. Tassa ilisimatusarnermik ilinniagaqarnissaq siunertarineqarneq ajorpoq.

- Nalunaqaarli. Immaqa ukiualuit qaangiuppata sammisaq taanna sammilissavara, Josephina oqarpoq, maannalu ilinniarnertuunngorniarfimmi ilinniakkani naammassiniarlugu tamakkiisumik ukkassilluni, sunngiffimmili sammisat tassaapput ikinngutit, eqaarsaarneq, nalunneq, arpanneq atuakkanillu atuarneq.