2014-mi
Oqallinneq: Soraarninngortarnerup kinguarnissaanut piffissaanngilaq
Soraarninngornertarnerup killigata kinguartinnissaanik siunnersuut illuatungilerneqarpoq. Danmarkiimi sulisartunut sanilliullugu sapaatip akunneranut sulinerup sivisunerunera sulinngiffeqarnerullu naannerunera pissutigalugu sulisartut nungullajaarnerusartut, Bodil Høyer Jensen isumaqarpoq
Soraarninngortarnerup kinguartinnissaa pinngitsaaliissutaanani piumasunut toqqarneqarsinnaasutut inissittariaqaraluarpoq.
Taama saqqummiussaqarpoq Bodil Høyer Jensen Qaqortumeersoq, Danmarkimi sulisartut aamma Nunatsinni sulisartut atugaat sanilliullugit nammineq naatsorsuisimasoq. Taamaasiorpoq sisamanngornermi Sermitsiaq.AG-mi ilanngunneqareersoq 2014-mut aningaasanut inatsisissatut siunnersuutip allaaserineqarneranut atatillugu.
- Ataqqilluinnarpakka namminneq kissaateqarnermikkut sivisunerusumik sulerusuttut. Aammali ilaqarput piumanngikkaluarlutik suliinnartariaqartunik. Taakkumi soraarnerussutisiaqarsinnaanngillat aapparisamik suliffeqarnera pissutigalugu, Bodil Høyer Jensen oqarpoq.
Kalaallit sulisartut sapaatip akunneranut akunnerit 40-ut sulisarput amerlanerilli sapaatit akunneri tallimat aasaanerani sulinngiffeqartarlutik. Illuanik Danmarkimi sulisartut sapaatip akunneranut akunnerit 37-it sulisarput amerlanerillu sapaatit akunnerit arfinillit aasaanerani sulinngiffeqartarlutik. Bodil Høyer Jensen ukiut qulit kingumut naatsorsuisimavoq.
- Danmarkimi sulisartunut sanilliullugu ukiut marluk sulinerusimassaanga. Soraarnerunngortarnermut killiliussaq 67-inut qaffanneqassappat assersuutigalugu 69-nik ukioqartarsimassaanga Danmarkimi sulisartunut sanilliutissaguma, Bodil Høyer Jensen naatsorsuinerminik nassuiaavoq.
Taanna taamaattumik isumaqarpunga soraarnerussutisianut killiussap qaffanissaa piumasaqaataanani piumasanut toqqarneqarsinnaasutut inissinneqartariaqartoq.
Soraarnerussutisiaqartarnermulli killiliussap qaffannissaa suli aalajangiunneqanngilaq. Soraarnerussutisiaqartarneq misissorneqareerpat aatsaat allannguisoqarsinnaanera isummerfigineqassaaq.