Oqallissaarisoq: IA Nunatsinniit qimarrannermut akisussaaqataavoq

Nunatsinniit Danmarkimut inuppassuit nussorput allaat ilaqutariit meerartallit Danmarkimut nuuttalerput inissaqarnissartik suliffissaqarnissartillu qulakkeeqqaarnagu. Imaannanngitsorsiorfimmili inuit tupiginarsinnaasunik ilioriasaarnerat tupaallaatissaanngitsoq siornatigut Inatsisartuni Folketingimilu ilaasortaq Otto Steenholdt.

Sara Olsvig Inuit Ataqatigiinneersoq apeqquteqaat tunngavigalugu oqallinnissamik Inatsisartunut siunnersuuteqarpoq Nunatsinniit Danmarkimut nussornerujussuaq unikaallatsinniarlugu.

- Naalakkersuisunngortartut suliassaq eqqumaffigilluagassaat tassaavoq innuttaasut suliffeqarnissaat.Suliffeqarnissaq pingaaraluaqisoq, aammali suli pingaarnerit ilagaat pisiassat akiisa aningaasarsiat amerlassusiannut naleqqussartuarnissaat.Tamanna akulikittumik Naalakkersuisunit suliarineqartartussaavoq, Otto Steenholdt oqarpoq.

Taassuma uparuarpaa qinigaaffimmi kingullermi Inuit Ataqatigiit, Demokraatit aamma Kattusseqatigiit Partiiata naalakkersuisuunerannni suliffissaaleqisut amerlisimanerat.

Taamaammat Otto Steenholdt isumaqarpoq kalaalerpassuit Danmarkimut nussornerannut Inuit Ataqatigiit akisussaaqataasut, taamaattumilu tupigikulullugu Inuit Ataqatigiinneersup Sara Olsvigip apeqquteqaat tunngavigalugu oqallinnissamut siunnersuummik saqqummiussinera. Steenholdt isumaqarpoq Sara Olsvigip apeqqutissani nammineq partiiminut sammitittariaqaraa.

- Kingulliullutik Naalakkersuisuusimasut IA-kut kalaallit Danmarkimut nutserarnerat taamanili aallartereersimasoq qanoq iliuuseqarfiginiarlugu aallarniuteqarsimappat? Apeqquteqaanni ima naggasiinnarliuk: ’Naalakkersuisuugallaratta ukiuni makkunani ajornartorsiutaangaalersoq qarsupilluinnarsimasarput, kalaallit Danmarkimut nutseralernerat, ilissi Naalakkersuisunngortusi suliarilaarsiuk!, Otto Steenholdt allappoq.

Otto Steenholdtip allagaa tamakkerlugu Sermitsiami sapaatip akunnera tulleq saqqummersussami atuarsinnaavat.