Oqalugiarneq: Atuarnermik ajornartorsiuteqarneq ilisimaneqarnerussaaq
Naqinnernik paasinnissinaannginnermut atuenermillu ajornartorsiuteqarnermut tunngatillugu Nuummi marlunngornermi unnukkut sammisaqartoqassaaq. Tassani innuttaasut innarluutit takussaanngitsut pissutaat ikiorsiissutissaallu pillugit ilisimasaqarnerulersinnaapput.
Kalaallit Nunaanni innuttaasut 7-10 procentii missaat atuarnermik ajornartorsiuteqarput imaluunniit naqinnernik paasinnissinnaanngilluinnarlutik, kisitsisit ilisimaneqarluartut takutippaat. Tassa Kalaallit Nunaanni innuttaasut 5.000-it missaat naqinnernik paasinnissinnaanngilluinnartuupput. Taamaakkaluartoq naqinnernik paasinnissinnaannginneq atuarnermillu ajornartorsiuteqarneq pillugu tapersersorneqarneq ikiorserneqarnerlu annikipput.
Thomas Mose aamma Mikael Højbjerg Ordblindetræning.dk-meersut atuarnermik ajornartorsiuteqarnermut aamma naqinnernik paasinnissinnaannginnermut/dysleksimut pissutaasinnaasut, aamma atuartut, ilinniartitsisut angajoqqaallu innarluut takussaanngitsoq tamanna qanoq iliuuseqarfigisinnaaneraat oqaluttuarniarput. Oqalugiaat Grønlandsbankenip kantiinaani marlunngornermi unnukkut arfineq-marlunut aallartissaaq.
- Oqalugiaatip matuma kingunerisaanik amerlanerusut paasilissavaat naqinnernik paasinnissinnaannginneq/dyslexi suunersoq, aamma innarluutaasoq takussaanngitsoq, inuunermilu atornissaa ilikkarneqarsinnaasoq, aamma meeqqat atuarfiat, inuusuttut atuarfiat qaffasinnerusumillu ilinniagaqaq naammassineqarsinnaasoq, ikiuisoqarpat, Thomas Mose aamma Mikael Højbjerg oqarput.
Suliniuteqarusuttunik piginnaaneqartunik ujaasineq
Thomas Mose aamma Mikael Højbjerg naapertorlugit misissuinerit takutippaat suliffinni aalajangersimasuni atuarniarnermikkut ajornartorsiutillit amerlanerujussuusut:
- Misissuinerit kingulliit takutippaat atuarniarnermikkut ajornartorsiutillit ilaatigut aallarnisaasut, ingeniørit ilusilersuisartullu akornanni amerlanerujussuusut.
Aamma oqalugiarnermi inuit atuarniarnermikkut allanniarnermikkullu unammillernartitaqaraluartut qanoq iluatsitsilluarsinnaasut pillugit oqaluttuat sammineqassapput.
Atuartut atuarniarnermikkut ajornartorsiutillit angajoqqaavi attaveqarfeqareerput, taakkulu suliffeqarfinnit kattuffinnillu 14-init taperneqarnermikkut ilaatigut oqalugiaammik matuminnga aaqqissuipput, Kalaallit Nunaanni naqinnernik ilisarsisinnaannginneq pillugu iliuuseqarneq qanoq pingaaruteqartigisoq erseqqissarniarlugu.
Suliniutit ingerlasut
- Allassinnaannginnermut tunngatillugu suliniuteqartoqareerpoq, ilaatigut meeqqat atuarfianni klassini nukarlerni atuarsinnaannginnermut misissuisoqartarluni.
- Suliap ingerlaannarnissaa pingaaruteqarluinnarpoq, meeqqat inuusuttullu takuneqarsinnaanngitsumik innarluuteqaraluarlutik, atuarnerminni ilinniakkaminnilu pitsaanerpaamik pissarsisinnaaqqullugit inuunermilu sapiissuseqarnissaannut ikiortariaqartut, angajoqqaat ilinniartitsisullu tapersersorniassammatigit, Thomas Mose aamma Mikael Hæjbjerg oqarput.
Oqalugiarnissamut peqataaneq akeqanngilaq soqutiginnittunullu tamanut ammalluni.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...