Oqaluttuarisaanermik qulaajaaneq: Politikerit akuliutinnginnissaminnik neriorsuipput

Hans Egedep illuani atsioqatigiinnertalimmik aaqqissuussinermi Naalakkersuisut siuliuttaasuat, Múte Bourup Egede aamma danskit Ilinniartitaanermut ilisimatusarnermullu ministeriat Christina Egelund neriorsuipput suliaminnik ilisimannittunit aammalu ilisimatuussutsikkut tunngavilimmik qulaajaaneq ingerlanneqassasoq.

Tassa qulaajaanerup tagginneqarallartutut ukiut tallimat iluanni suliarineqarnera politikkikkut akuliuttoqassanngilaq.

- Pingaartumik ukiuni kingulliunerusuni allaallu qanittunnguaq tikillugu ataatsimoorluta oqaluttuarisaanitsinni pisarsimasut oqimaatsut, taartut aammalu ilungersunartut saqqummerarput. Tamatuma pissutissaqalersippaatigut oqaluttuarisaanermi pisarsimasut pillugit qulaajaasoqarnissaa aallartissallutigu, tassungalu ilisimatuut suleqatigiittussat maanna inuttalertussanngorpagut, taakkulu maani Nuummi aallaaveqassapput suliassarissavaallu, politikkikkut akuliuffigineqaratik qulaajaassallutik, taamaalillutillu uagutsinnut pituttorsimaffeqaratik suliartik ingerlattussaassavaat, oqaluttuarisaaneq pissutsit piviusut aallaavigalugit saqqummersinneqarsinnaaqqullugu, Christina Egelund ilaatigut nassuiaavoq.

Ikiorneqarnissamik pisariaqartitsisoqalersinnaavoq

Qulaajaanerulli nalaani politikkikkut iliuuseqartoqannginnissaa takorluugaannaassagunarpoq. Tassami ataaseq tassaavoq qulaajaaneq suliaminnut ilinniarsimasut ingerlataat aammalu politikkikkut akuliuffigineqanngitsoq, allali tassaavoq inuit kalluarneqartussat, aalajangiisarsimanerit iliuuseqartarsimanerillu kingunerisaanik toqqaannartumik timimikkut tarnimikkullu arlaatigut eqqugaasimasut aqqusaarsimasaminnik qaqilerisoqarneratigut misigisimasaminnik puttallartoorsinnaanissaat.

Qulaajaasitsinissarmi pineqartoq inunnut ataasiakkaanut tunngassutartorujussuussaaq, sorsunnersuummi nalaaniit kingornalu manna tikillugu politikkikku aalajangiisarnerit taakkulu malitsigisaanik iliuuseqartarnerit inunnut ataasiakkaanut eqimattakkaanullu kalluaasuummata.

Manna tikillugu kikkunnit tamanut siammartumik pisimasut anillaanneqarsimasut qissimiinnarutsigit, assersuutigiinnarlugu spiralilersuisimanermi eqqugaasimasorpassuit aliasuutitik tarnikkullu naalliuutitik ikertut ammaqqinneqartutut misigisimavaat, ilaatigut taakku ilaat namminneq qitornartaarsinnaajunnaartitaasimagamik.

Kingunerluuteqartunut ikiuinissaminnut Danskit neriorsuuteqanngillat

Kalaallit niviarsiaqqat arnallu piumassuserinngisaminnik spiralilersorneqarsimasut qaqileriffigineqalermata arnarpassuit anniaatigisaminnik tarnikkullu ikiminnik suanngartoorsimammata Kalaallit Nunaanni tarnip pissusiinik ilinniarsimasunit ikiorneqarnissaminnik neqeroorfigineqarnikuupput, taakkulu oqaaseqartartuata Naja Lyberth-ip statsminister Mette Frederiksen qanittukkut tikeraarmat kaammattorpaa kalaallit arnat Danmarkimi najugaqartut nunatsinnisut ikiorneqarnissaminnik neqeroorfigineqassasut.

Ilinniartitaanermut ilisimatusarnermullu ministeri Christina Egelund, imaaliinnarluni arlaatigut oqaluttuarisaanermi aalajangikkat kingunerisaanik eqqugaasimasut Danmarkimi najugaqartut ikiorneqarsinnaanissaannik neriorsuuteqarsinnaannginnerarpoq.

- Pisimasut imminnut assingusut matumani pineqarput, maanna qujanaqisumik spiralilersuisimaneq pillugu qulaajaasoqarpoq, taamaalilluni tamanna qanoq pisimanersoq pillugu eqqortumik qaqilerneqassaaq, isumagalu naapertorlugu oqaluttuarisaanermi pisarsimasut pillugit qulaajaasitsinermut assingusuuvoq, siullermik qulaarneqarnera eqqortumik tunngavilik pigileqqaartariaqarparput, tamatumalu kingorna isummerfigisariaqarlutigu, ilinnniartitaanermut ilisimatusarnermullu ministeri Christina Egelund akivoq.

Naalakkersuisut siulittaasuat tassunga tunngatillugu oqarpoq, qulaajaanermi inuit kalluarneqartut aalajangiinernillu malitsilinnit arlaatigut eqqugaasimasut qajassuunneqarumaartut ikiuisoqarnissaanullu piareersimasoqarumaartoq.

Múte Bourup Egede akisussaatitsinissamik piumasaqarpoq

Qulaajaasitsineq maanna aallartinneqartussanngortoq politikkikkut aalajangigaallunilu ilusiligaavoq. Tamanna Naalakkersuisut siulittaasuata saqqummiinerminni naqissuserpaa.

- Ukiuni arlalissuanngortuni pisimasut piviusut akuersaarneqarsinnaanngitsut saqqummertartut arlalissuupput aammalu suli saqqummertoqartarluni. Pisariaqartipparput pisimasunut piviusunut tamakkununnga akisussaaffimmik inissiisoqarnissaa, tamannami aqqutigalugu Nunatta Danmarkillu akornanni saammaasseqatigiinneq ilumoortoq aatsaat angusinnaagatsigu aammalu siunissarput ilusilersorsinnaagatsigu.

- Oqaluttuarisaanitsinni pisarsimasut taakku paasisariaqarpavut siunissarput pilersikkumallutigu, tassami piviusuuvoq, nunatta Danmarkillu akornanni najummatsisimaneq pilersinneqartuarmat ataatsimoorluta oqaluttuarisaanitsinni pisarsimasut taartut akuersaarneqarsinnaanngitsullu puttallartuartillugit, Múte Bourup Egede oqarpoq.

Suliakkiut tamakkiisoq UANI atuaruk