»Oqartussavittut«
Danskit naalakkersuisui nutaat kalaallit folketingimut ilaasortaannit, Kalaallit Nunaat pillugu – Kalaallit Nunaat avaqqullugu aalajangiisoqartannginnissaanut neriorsuuteqarnermut tunngatillugu qanimut malinnaaffigineqassapput.
Danmarkimi naalakkersuisut nutaat SVM uppisinniarneqalissappata, Aki-Matilda Høegh-Dam aamma Aaja Chemnitz Savalimmiormiut suleqatigissavaat. Kisianni Siumup oqarnera naapertorlugu isumannaatsuutitsinissaq akeqarpoq.
Aviisi AG taama allappoq.
– Nunatsinnut tunngasuni Nunarput avaqqullugu aalajangiisoqartannginnissaa naatsorsuutigaara. Nunatsinnut tunngatillugu qanoq pisoqarnersoq ilisimatinneqartassaagut. Qanoq pisoqarnissaa aalajangeeqataaffigisassavarput. Tunngaviusumik inatsimmut innersuussilluni taamaalillunilu Kalaallit Nunaata aalajangeeqataatinneqartannginneranik eqqarsartariaaseqarneq taamaatinneqassaaq, Aki-Matilda Høegh-Dam oqarpoq.
– Tamanna qanoq pisassava?
– Kalaallinut tunngasuni oqartussavittut itigartitsisinnaassuseqarnissaq anguniagaavoq, Aki-Matilda akivoq.
Siumumi politikerip oqarnera naapertorlugu, nunatsinni pissutsit – aamma nunat tamalaat pillugit paasissutissat – Naalakkersuisunut avitseqatigineqartarnissaannut tunngavoq, taakku Inatsisartunut paasititsinissamut aamma akisussaaffeqarput. Nunanut allanut politikki tassunga atatillugu ilaavoq, naak inatsit tunngaviusoq malillugu danskit taanna akisussaaffigigaluaraat.
- Kalaallit Nunaat nunanut allanut politikkimi tamakkiisumik peqataatinneqartarnissaa, danskit naalakkersuisuinit oqaluttuarisaaneq qiviaraanni akueriuminaattarsimavoq. Kisianni nunanut allanut politikkimut tunngatillugu suliani paasissutissat Danmarkip pigisai pissarsiarisinnaasariaqarpavut, Aki-Matilda Høegh-Dam erseqqissaavoq.
Aviisimi AG-mi atuarnerusinnaavutit. Aviisi uani pissarsiariuk:
