P-pille't nutaat taqqakkut milittoortitsisinnaapput
Eqqortumik oqaatigalugu p-pille't nutaat pisoqqanit marloriaammik akisunerupput marloriaaammillu ulorianarnerullutik, ilisimatooq oqarpoq
P-pille't nutaaliaanerpaat aamma "kinguaariit" pingajuattut sisamaatullu oqaatigineqarsinnaasut, taqqatigut milittuussutaasinnaaneri pisoqaanernit "kinguaariit" aappaaneersunit annerusoq, Information allappoq.
Danskit misissueqqissaarnerisa professor Øjvind Lidegaardimit, Rigshospitalimi ingerlanneqartup pingasunngornermilu British Medical Journal tamanut takusassiarineqartup ersersippaa: - Eqqortumik oqaatigalugu p-pille't nutaat pisoqqanit marloriaammik akisunerupput marloriaaammillu ulorianarnerullutik, ilisimatusartoq oqarpoq.
Ukiut tamaasa danskit arnat tallimat 15-49'nut ukiullit taqqamikkut milittoorlutik toqusarput. Taakkunannga arnat pingasut sisamallu akornanni p-pille'nik atuineq toqqutigisarpaat.
Misissueqqissaarnerit ukiuni kingullerni ingerlanneqartut pasinarsisippaat p-pille't nutaaliat pisoqqanit ulorianarnerusut, kisianni Øjvind Lidegaardip misissuinerata nutaap ersersippaa, assigiinngissut siullermik ilimagisamit annerusoq: -Paasivarput p-pille't naatsorsuutigisamit ulorianarnerusut - aamma kinguaariit aappaasa kinguaariit pingajuannit sisamaannillu assigiinngissutaat naatsorsuutigisamit anginerusoq, Øjvind Lidegaard oqarpoq.
Professorip misissuinermini danskit p-pille'nik atuisut 15-49 ukiullit tamaasa ilannguppai. Iisartakkat nutaajunerpaat pisoqqallu assigiinngissutaat annertuvoq.
Arnat p-pille't kinguaariit aappaaneersunik atuisut akornanni 1000'iuppata ataaseq taqqamigut milittoortarpoq. Arnat p-pille't kinguaariit pingajuannik sisamaannillu atuisut akornanni 500'juuppata ataaseq eqqorneqassaaq. Taamaattoq nutaaliaanerpaat Yasmin, Yasminelle aamma Yaz amerlanerpaarpaanit pisiarineqarsinnaapput.
Danskit p-pille'nik atuisut 84 procentiisa iisartakkat kinguaariit pingajuannit sisamaanneersullu iiorartagaraat. Sinneruttut 16 procentiisa iisartakkat kinguaariit aappaaneersut iiorartagarigaat.
Politiken naapertorlugu paasissutissat nutaat pissutaallutik Dansk Selskab for Obstetrik og Gynækologi'mik ilaasortat p-pille't pillugit siunnersueriaasiat allanngortinneqarpoq.
Taqqatigut milittoortoqarsinnaanera pissutigalugu nakorsat p-pille't kinguaariit siulliannit aamma aappaaneersut tunniuttariaqarpaat.